Davlat xizmati ko‘rsatishda eng ko‘p qonunbuzilish holati aniqlangan vazirlik va idoralar ma’lum qilindi

“Davlat xizmatlari yangiliklari” kanalida yozilishicha, davlat xizmatlari bo‘yicha eng ko‘p qonunbuzilish holati kommunal idoralarda aniqlandi – 44 731 ta.

Undan keyingi o‘rinlardan mos ravishda 10 118 ta hamda 7 655 ta qonunbuzilish holati qayd etilgan kadastr idoralari va qurilish idoralari joy oldi.

Ushbu ko‘rsatkich sog‘liqni saqlash muassasalarida – 4 830 ta holatni, hokimliklarda – 4 755 ta holatni tashkil qildi.

Bundan oldin davlat xizmatlari ko‘rsatilishi sohasida joriy yilning o‘tgan 9 oyi mobaynida jami 99 883 ta qonunbuzilish holati aniqlangani xabar berilgandi.

Shundan 81 458 tasi muddat buzilishi, 7 115 tasi ortiqcha hujjat talab qilish, 4 593 tasi to‘g‘ridan to‘g‘ri davlat xizmati ko‘rsatish, 2 113 tasi asossiz rad etish, 10 tasi vakolatli organ qonuniy talabini bajarmaganlik hamda 4 594 tasi boshqa turdagi qonunbuzilishlarni tashkil etadi.