Raqobat qoʻmitasi 2026-yilning birinchi yarim yilligida reklama bozorini tartibga solish sohasida amalga oshirilgan ishlar boʻyicha maʼlumot berdi.
Qayd etilishicha, oʻtgan davr mobaynida reklamalar boʻyicha jami 13 ming 500 dan ortiq oʻrganish oʻtkazilgan. Ularning qariyb 6 mingtasida reklama toʻgʻrisidagi qonunchilik talablari buzilgani aniqlangan.
Xususan, dori vositalari va biologik faol qoʻshimchalarga oid 545 ta reklama oʻrganilib, ularning 51 tasi qonun talablariga javob bermasligi maʼlum boʻlgan.
Shuningdek, qariyb 250 ta holat oʻrganilganda, 54 tasida tamaki, alkogol, elektron sigaret va pivo kabi reklamasi taqiqlangan mahsulotlar targʻib qilingani aniqlangan.
50 dan ortiq qimor sayti bloklandi
Qoʻmita tomonidan oʻtkazilgan 165 ta monitoring natijasida 82 ta holatda totalizator va bukmekerlik reklamasi qayd etilgan.
Bundan tashqari, qimor va tavakkalchilikka asoslangan oʻyinlarni targʻib qiluvchi 76 ta veb-saytga nisbatan chora koʻrish uchun vakolatli organlarga soʻrovlar yuborilgan. Natijada ularning 50 dan ortigʻi bloklangan.
Ijtimoiy tarmoqlardagi monitoringlar davomida katta auditoriyaga ega uch nafar bloger - vayner oʻz sahifalarida qimor va bukmekerlik xizmatlarini targʻib qiluvchi sahnalashtirilgan videoroliklarni joylashtirgani ham aniqlangan.
Ularga nisbatan maʼmuriy bayonnomalar rasmiylashtirilgan.
Jumladan, ijtimoiy tarmoqlarda «Melbet» brendi orqali qimor oʻyinlarini targʻib qiluvchi videolar joylashtirish holatlari qayd etilgan. Qoʻmita maʼlumotiga koʻra, bu holatlar boʻyicha fuqarolar belgilangan tartibda maʼmuriy javobgarlikka tortilib, tegishli materiallar sudga yuborilgan.
Umuman, aniqlangan huquqbuzilishlarni bartaraf etish boʻyicha 83 ta subyektga nisbatan belgilangan taʼsir choralari qoʻllanilgan.
Ayrim dori reklamalari axloq normalariga zid deb topildi
Monitoring davomida ayrim dori vositalari va tibbiy buyumlarni ishlab chiqaruvchi hamda sotuvchi kompaniyalarning reklamalarida milliy va oilaviy anʼanalar, shuningdek, axloq va maʼnaviyatning umum qabul qilingan normalariga zid shakl, ibora va obrazlardan foydalanilgani ham aniqlangan.
