Qashqadaryoda qalbaki AQSh dollariga mashina xarid qilmoqchi bo‘lgan shaxslarga jinoyat ishi qo‘zg‘atildi

Bosh prokuratura huzuridagi departamentning ma’lum qilishicha, departamentning Shahrisabz tuman bo‘limi tomonidan qalbaki pullar muomalaga kiritilishining oldini olish maqsadida tergovga qadar tekshiruv o‘tkazilgan.

Tekshiruvda, fuqaro A.J. va R.M. o‘zaro til biriktirib, fuqaro M.ga tegishli bo‘lgan Cobalt mashinasini 13 400 AQSh dollariga sotib olishga kelishib, unga aldov yo‘li bilan 134 dona 100 dollarlik qalbaki kupyuralarni bergani aniqlangan.

Qayd etilishicha, mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq, Toshkentda 15 mingdan ortiq qalbaki dollar musodara qilingandi.