«Obod qishloq» va «Obod mahalla» dasturi ijrosidagi kamchiliklar uchun mingdan ortiq mas’ul javobgarlikka tortildi, 3 mingdan ortig‘i ogohlantirildi. Bu haqda Bosh prokuratura bo‘lim boshlig‘i Abdurahim Muhiddinov ma’lum qildi.
Qayd etilishicha, yuklatilgan vazifa va topshiriqlar ijrosida kamchilikka yo‘l qo‘ygan va o‘z vazifasini lozim darajada bajarmagan 427 nafar mas’ullar intizomiy va 724 nafari ma’muriy javobgarlikka tortildi, 3040 nafar shaxs rasman ogohlantirildi.
Jazolanganlar orasida Qoraqalpog‘iston Vazirlar Kengashi raisi, Qashqadaryo, Namangan, Surxondaryo va Toshkent viloyati hokimlarining hamda 107 nafar tuman (shahar) hokimlarining o‘rinbosarlari, Madaniy meros agentligi direktori, Madaniyat, Favqulodda vaziyatlar vazirligi, O‘rmon xo‘jaligi davlat qo‘mitasi, Gidrometeorologiya xizmat markazi hamda “O‘zsuvta’minot” AJ rahbarlarining sohaga mas’ul o‘rinbosarlari bor.
Qo‘pol qonunbuzilish holatlari yuzasidan 185 ta jinoyat ishlari qo‘zg‘atilgan, 880 nafar fuqaro va tadbirkorlar buzilgan huquqlari tiklangan.
