O‘zbekistonda dekabr oyida Islom ulamolari anjumani bo‘lib o‘tadi

Xorij tomoni bilan halol sertifikatini joriy qilish, indoneziyalik ziyoratchilarni “Umra+” ziyorat dasturlari doirasida O‘zbekistonga jalb etish, qadimgi qo‘lyozmalarni tadqiq qilish, imomlar ishtirokida ikki mamlakat hududlarida konferensiya va ko‘rgazmalar tashkil etish yo‘nalishlarida o‘zaro hamkorlikni rivojlantirish muhokama qilindi.

Indoneziya tomoni O‘zbekiston diniy tashkilotlari bilan yuqorida qayd etilgan yo‘nalishlarda hamkorlik qilish hamda joriy yil 3 dekabr kuni mamlakatda bo‘lib o‘tishi rejalashtirilgan Islom ulamolari anjumanida qatnashish yuzasidan qiziqish bildirdi.

Uchrashuv yakunlari bo‘yicha Indoneziya Ulamolar kengashi bilan o‘zaro hamkorlikni yanada rivojlantirish bo‘yicha memorandum imzolash yuzasidan kelishuvga erishildi. 

Indoneziya Ulamolar kengashi davlat tomonidan moliyalashtiriladi. Kengash Indoneziyadagi eng yuqori islom ulamolari organi sifatida 1975 yil 26 iyul kuni tashkil etilgan bo‘lib, hozirgi kunda Indoneziyadagi islomiy tashkilotlar ustidan nazoratni muvofiqlashtiradi.

Oziq-ovqat, pardoz-andoz, dori-darmon va kiyim-kechak singari mahsulotlarga halol sertifikatini berish hamda islomni mustahkamlash, ulamolar milliy taraqqiyotdagi ishtirokini kuchaytirish, Indoneziyada turli dinlar o‘rtasidagi uyg‘unlikni saqlash kengash asosiy vazifalari sirasiga kiradi.

Mamlakat delegatsiyasi a’zolari Indoneziyaning nufuzli Muhammadiya musulmon tashkiloti bosh kotibi Abdul Mutni bilan ham uchrashdi. Muhammadiya tashkiloti vakillariga islom ilmini o‘rganish, imomlar tayyorlash, indoneziyalik haj va umra ziyoratchilarini O‘zbekistonga qo‘shma ziyorat dasturlari doirasida jalb qilish taklifi bildirildi. Hamkorlik boshlang‘ich pog‘onasi sifatida Muhammadiya tashkiloti rahbariyati va vakillarining ziyorat turizmi dasturi doirasida mamlakatga amaliy safarini tashkil etishga kelishib olindi.