Jazoni ijro etish muassasalarida saqlanayotgan xotin-qizlar kasb-hunarga o‘qitiladi

“Jazoni ijro etish muassasalarida saqlanayotgan va jazo muddatini o‘tab bo‘lgan xotin-qizlarni mehnat bozorida raqobatbardosh kasb-hunar turlariga o‘qitish orqali bandligini ta’minlashga ko‘maklashish hamda ularni qiynab kelayotgan muammolarni hal etish tartibi to‘g‘risidagi nizomni tasdiqlash haqida”gi qaror loyihasi e’lon qilindi.

Nizom prezidentning “Oila va xotin-qizlarni tizimli qo‘llab – quvvatlashga doir ishlarni yanada jadallashtirish chora-tadbirlari to‘g‘risida”gi farmoni ijrosini ta’minlash hamda jazoni ijro etish muassasalarida saqlanayotgan, jazo muddatini o‘tab bo‘lgan xotin-qizlarni mehnat bozorida raqobatbardosh kasb-hunar turlariga (tikuvchilik, bichuvchilik, to‘quvchilik, kashtachilik, dizayner, sartarosh, pazandachilik, tadbirkorlik va boshqa) o‘qitish orqali bandligini ta’minlashga ko‘maklashish faoliyatini tashkil etish tartibini belgilaydi.

Jazoni ijro etish muassasalarini ma’muriyati jazoni ijro etish muassasalarida saqlanayotgan xotin-qizlarni muammolarini quyidagi tartibda o‘rganadi:

• jazo muddatini o‘tayotgan xotin-qizlarni murojaatlarni tahlil qilish orqali ularni qiynab kelayotgan muammolarini aniqlaydi;
• jazo muddatini o‘tayotgan xotin-qizlar o‘rtasida so‘rovnoma o‘tkazish orqali ularni qiynab kelayotgan muammolarini aniqlaydi;
• jazo muddatini o‘tayotgan xotin-qizlarni murojaatlar hamda so‘rovnoma natijalarini tahlil qilish orqali aniqlangan muammolarini hal etishga ko‘maklashadi;
• jazoni ijro etish muassasa ma’muriyati vakolatiga kirmaydigan muammolarini hal etish maqsadida tegishli idora va tashkilotlar bilan hal etish chorasini ko‘radi.

Probatsiya bo‘linmalari va Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati hududiy bo‘linmalari xodimlari probatsiya nazoratidagi hamda jazo muddatini o‘tab bo‘lgan xotin-qizlar muammolarini quyidagi tartibda o‘rganadi:

• huquqbuzarliklar profilaktikasi bo‘linmalari xotin-qizlar bilan ishlash masalalari bo‘yicha inspektori, huquqbuzarliklar profilaktikasi (katta) inspektori va probatsiya bo‘linmalari inspektori birgalikda yoki alohida probatsiya nazoratidagi xotin-qizlar va jazo muddatini o‘tab bo‘lgan xotin-qizlar bilan suhbat o‘tkazib, qanday faoliyat bilan shug‘ullanish hamda ishga joylashish va turmushga moslashishi uchun yordamga ehtiyojini va boshqa muammolari borligini aniqlaydi;
• suhbat jarayonida aniqlangan muammolarini hal etish hamda ijtimoiy reabilitatsiya qilish va ijtimoiy moslashtirish choralarini ko‘radi;
• huquqbuzarliklar profilaktikasi va probatsiya bo‘linmalari vakolatiga kirmaydigan muammolarini hal etish maqsadida tegishli idora va tashkilotlar bilan hamkorlikda hal etish chorasini ko‘radi.

Jazoni ijro etish muassasalarida saqlanayotgan, probatsiya nazoratidagi hamda jazo muddatini o‘tab bo‘lgan xotin-qizlarni mehnat bozorida raqobatbardosh kasb-hunar turlariga o‘qitishdan ko‘zlangan asosiy maqsad quyidagilardan iborat:

• xotin-qizlarni kelgusida jamiyatga ijtimoiy moslashuvini ko‘zlab, mehnat bozoridagi kon’yukturani hisobga olgan holda ular kasb-hunarga ega bo‘lish istaklarini ro‘yobga chiqarish, kasb-hunarga ega bo‘lishlariga ko‘maklashish;
• jazoni ijro etish muassasalaridan ozod etilgan xotin-qizlar jamiyatga moslashuvchanligini oshirish;
• xotin-qizlarni kasb-hunarga o‘qitish orqali ular bandligiga ko‘maklashish;
• iqtidorli xotin-qizlarni aniqlash, ularni kelajakda kasb-hunarni egallashida har tomonlama qo‘llab-quvvatlash;
• xotin-qizlar orasida ishsizlik darajasi kamaytirish, ayollar tadbirkorligini oshirish, kambag‘allikni qisqartirish;
• ish qidirayotgan yoki ishsiz deb e’tirof etilgan probatsiya nazoratidagi va jazo muddatini o‘tab bo‘lgan xotin-qizlarni kasbga tayyorlashga, qayta tayyorlashga hamda ular malakasini oshirishga qaratilgan tadbirlarni amalga oshirish;
• xotin-qizlarni bandligini ta’minlash orqali ular tomonidan sodir etiladigan huquqbuzarliklar oldini olish;
• probatsiya nazoratidagi va jazo muddatini o‘tab bo‘lgan xotin-qizlarni munosib ish topishlariga har tomonlama ko‘maklashish;
• og‘ir ijtimoiy ahvolga tushib qolgan xotin-qizlarga ijtimoiy-huquqiy, psixologik yordam ko‘rsatish;
• xotin-qizlar o‘rtasida sog‘lom turmush tarzini shakllantirish, oiladagi ma’naviy-axloqiy qadriyatlarni mustahkamlash bo‘yicha manzilli chora-tadbirlarni amalga oshirish;
• xotin-qizlar yo‘nalishidagi nodavlat notijorat tashkilotlarni jalb qilgan holda probatsiya nazoratidagi xotin-qizlar va jazo muddatini o‘tab bo‘lgan xotin-qizlar bilan ma’naviy-ma’rifiy tadbirlar o‘tkazish;
• probatsiya nazoratidagi hamda huquqbuzarliklar profilaktikasi bo‘linmalari profilaktik hisobida turgan va ular ma’muriy nazoratidagi xotin-qizlar ijtimoiy-psixologik portretni tuzish orqali ular bilan maqsadli ijtimoiy moslashtirishga qaratilgan ishlarni tashkillashtirish.