Ukraina harbiy budjet xarajatlarini 10,5 milliard yevroga oshirdi

Hujjatga ko‘ra, qo‘shimcha mablag‘larning asosiy qismi Mudofaa vazirligiga yo‘naltiriladi – 365,2 milliard grivna (9,9 milliard yevro). 

«Davlat budjetining umumiy jamg‘armasi bo‘yicha qo‘shimcha xarajatlarni qoplash maqsadida davlat ichki qarzlari ko‘paytirildi va shunga mos ravishda 2022 yil 31 dekabr holatiga davlat qarzining maksimal miqdori oshirildi», — deyiladi xabarda. 

Qayd etilishicha, bunday qonunning amalga oshirilishi «milliy xavfsizlik va mudofaa sohasidagi dolzarb vazifalarni hamda Rossiya Federatsiyasining Ukrainaga qarshi qurolli tajovuzini qaytarish bo‘yicha chora-tadbirlarni amalga oshirishga, davlatning harbiy xizmatchilarga o‘z vaqtida va to‘liq moddiy yordam to‘lash majburiyatlarini bajarishga imkon beradi.

Bundan oldin Ukraina prezidenti Volodimir Zelenskiy harbiy holat sharoitida tizimli banklarni milliylashtirish to‘g‘risidagi qonunni imzoladi. 

Yangi qoida Moliya vazirligiga Rossiya Federatsiyasining harbiy tajovuzkorligi natijasida yuzaga kelgan asoslar bo‘yicha Ukraina Milliy bankining taklifiga binoan tizimli ahamiyatga ega banklarni bozordan olib chiqish huquqini beradi. 

Milliylashtirish bankni to‘lovga layoqatsiz deb tasniflash tartibida amalga oshiriladi, lekin davlatdan qo‘shimcha kapitallashtirishni talab qilmaydi.