«Bu masalada O‘zbekiston bilan hamfikr emasmiz» – nemis rasmiysi «Tolibon» haqida

1 noyabr kuni Toshkentda O‘zbekiston tashqi ishlar vaziri Vladimir Norov va Germaniya Federativ Respublikasi tashqi ishlar vaziri Annalena Berbok OAV vakillari uchun o‘tkazgan brifingda Afg‘oniston masalasi ham ko‘tarildi. Bu haqda Kun.uz muxbiri habar bermoqda.

«O‘sha kundan boshlab [2021 yil sentabrda Afg‘oniston hokimiyatiga «Tolibon» kelgani nazarda tutilmoqda – tahr.] siz uchun hayot osonlashgani yo‘q. Chunki, inqirozlar o‘chog‘i shundoqqina sizning ostonangizda turibdi. O‘tgan yili yozdan buyon «Tolibon» ayollarning ta’lim olish va erkinlikka bo‘lgan huquqlarini o‘g‘irlamoqda. Shuning uchun afg‘onistonliklar qo‘rquvda yashayapti, chunki yashash va yashab o‘tish ikki xil narsa.

Hozirgi kunda federal hukumat har oyda minglab kishini O‘zbekiston orqali Germaniyaga olib chiqib ketish bo‘yicha qaror qilgan. Bular birinchi navbatda eng ko‘p tazyiqqa uchragan Afg‘oniston fuqarolari bo‘ladi. Ularni qanday qilib O‘zbekiston orqali olib chiqib ketishni biz siz bilan [Vladimir Norov nazarda tutilmoqda] muhokama qildik», - deya Germaniya tashqi ishlar vazirining so‘zlarini keltirmoqda Kun.uz muxbiri.

Brifingdan so‘ng, Vladimir Norov O‘zbekiston24 muxbiri savoliga javoban O‘zbekiston Afg‘onistonga yordam berayotgani, u yerda tinchlik o‘rnatilishi va gumanitar inqirozning oldini olish borasida harakat qilayotganini ta’kidladi. Shuningdek, Norov Afg‘onistonning xorijda muzlatilgan aktivlarini qaytarish va u yerdagi infratuzilmalarni qayta tiklashda jahon hamjamiyati yordam berishi kerakligi haqida fikr bildirdi.

Annalena Berbok Vladimir Norovning javobidan so‘ng O‘zbekiston bilan bu borada hamfikr emasligini va hozirgi Afg‘oniston hukumati qilayotgan ishlarga Germaniya qarshiligini bildirib o‘tdi.

«Biz Afg‘onistondagi fuqarolarni taqdir taqozosiga tashlab ketishga haqqimiz yo‘q, bunday qilmaymiz ham. Oxirgi oylarda u yerda bo‘layotgan inqiroz va holatlarni ko‘ryapmiz. Oldimizda qish turibdi, u o‘ziga yarasha qiyinchiliklarni olib keladi. Biz federal hukumat sifatida Afg‘onistondagi insonlarga yordam berishni davom ettiramiz. O‘zbekistonning Afg‘oniston borasida amalga oshirayotgan ishlarini yuqori baholaymiz va tasanno aytamiz.

Lekin qanday bo‘lganda ham biz bu masalaga O‘zbekiston bilan har xil qarashga egaligimizni tushunib yetdim. Chunki biz uchun «Tolibon» Afg‘onistonda odamlarning erkinliklarini o‘g‘irladi. Fursatdan foydalanib aytib o‘tmoqchimanki, biz hozirgi Afg‘oniston hukumatining qilayotgan ishlariga qarshimiz», - dedi Annalena Berbok.