Madaniyat vazirligi 15,5 mlrd so‘mga 2ta mashina sotib olganiga izoh berildi

Izohga ko‘ra, prezidentning “Madaniyat va san’at sohasini yanada rivojlantirishga doir qo‘shimcha chora-tadbirlar to‘g‘risida” qaroriga ko‘ra, 2022 yil 1 iyungacha “Madaniyat karvoni” uchun mo‘ljallangan, tegishli musiqa texnikasi va sahnaga ega 2 dona maxsus avtotransport vositasini xarid qilish vazifasi belgilangan.

Vazirlik munosabatida aytilishicha, “Madaniyat karvoni” uchun mo‘ljallangan, tegishli musiqa texnikasi va sahnaga ega maxsus avtotransport (transformer) vositasining texnik parametrlari mutaxassislar tomonidan belgilangan tartibda ishlab chiqilgan. Bunday zamonaviy avtotransport vositasini tayyorlash imkoniyati bo‘yicha xorijiy davlatlar o‘rganildi va eng ma’quli sifatida Xitoy davlati tanlanib, vazirlik tomonidan OMDM va “Huayuan” kompaniyasi bilan muzokara olib borildi. Muzokara xulosasiga ko‘ra, OMDM kompaniyasi tomonidan 873 ming AQSh dollari, Olmaota shahridagi “Kazakhstan musical technologies” filiali tomonidan 900 ming AQSh dollari taklifi (bitta maxsus avtotransport vositasi xaridi uchun) bildirilgan. Biroq xorijiy kompaniyalar pandemiya sababli maxsus avtotransport vositasi yil yakuniga qadar yetkazib berilishini ma’lum qilgan. 

Shundan so‘ng Madaniyat vazirligi ishlab chiqilgan texnik parametrlar asosida maxsus avtotransport (transformer) vositasini tayyorlash imkoniyati mavjud bo‘lgan (aniq muddati va boshqa ma’lumotlar) mahalliy korxonalar bilan muloqot olib borish va tegishli xulosa olish maqsadida “Oʻzavtosanoat” AJ, “UzAvto Trailer” MChJ va “JV MAN Auto-Uzbekistan” MChJ qo‘shma korxonasiga murojaat qilgan.

“JV MAN Auto-Uzbekistan” MChJ qo‘shma korxonasi tavsiyasi asosida “JV MAN Auto-Uzbekistan” tomonidan 1 mln 390 ming yevro, Turin politexnika universiteti (Surxondaryo viloyati uchun tajriba sifatida kichik hajmdagi, musiqa texnikasi va sahnaga ega maxsus transport vositasini ilk marotaba ishlab chiqargan) tomonidan 9 mlrd 580 million so‘m hisobiga maxsus avtotransport vositasini tayyorlash, qolgan korxonalar va “Uz Truck and Bus Motors” MChJ tomonidan esa 1 mlrd 395 mln so‘mga transportning faqat tyagach qismi (bosh qismi) bilan ta’minlash imkoniyati ma’lum qilingan.

“Madaniyat karvoni” uchun mo‘ljallangan maxsus avtotransport vositasini mahalliy korxonalar (Turin politexnika universiteti) bilan birgalikda mukammal ishlab chiqish, tayyorlash va zarur uskunalar bilan jihozlash choralari ko‘rilib, Vazirlar Mahkamasining qaroriga asosan to‘g‘ridan-to‘g‘ri shartnoma tuzilgan.

“Aytish joiz, aslida bu ko‘pchilik o‘z tasavvuriga ko‘ra taxmin qilib, turlicha talqin etayotgan yengil avtomobil emas. Nomidan ham anglash mumkinki, bu tegishli musiqa texnikasi va sahnaga ega maxsus avtotransport vositasidir. Boshqacharoq qilib uni zamonaviy, ulkan “Mobil sahna” deyish ham mumkin. Bunday transport vositalari buyurtma asosida maxsus ishlab chiqariladi. Ya’ni u “Madaniyat karvoni” tadbirlarini eng chekka manzillarda ham yuqori saviyada, sifatli texnik imkoniyatlar asosida o‘tkazishga xizmat qiladi. Ulkan sahna ko‘chma shaklda olis qishloqlargacha yetib boradi”, – deyiladi vazirlik xabarida.