Rossiya AQShning 200 nafar fuqarosiga nisbatan shaxsiy sanksiyalar kiritdi

Moskva sanksiyalar ro‘yxatiga AQSh prezidentining singlisi va ukalari kiritilgan, ularga Rossiyaga kirish taqiqlandi.

Foto: Rossiya TIV

Rossiya Tashqi ishlar vazirligi yana 200 nafar AQSh fuqarosiga nisbatan shaxsiy sanksiyalar kiritdi. Bu haqda 11 noyabr, juma kuni Rossiya TIV saytida ma’lum qilingan.

Gap Amerika rasmiylari vakillari, qonun chiqaruvchilar, ularning yaqin qarindoshlari, harbiy-sanoat kompleksi (HSK) kompaniyalari va korxonalari rahbarlari, ekspertlar va lobbichilar haqida ketmoqda.

Ro‘yxatga, xususan, AQSh prezidenti Jo Baydenning qarindoshlari – singlisi Valeri Bayden Ouens, ukalari Jyeyms va Frensis Baydenlar, shuningdek, bir qator senatorlar, jumladan Vermontdan Berni Sanders va Massachusets shtatidan Elizabet Uorren kiritilgan. Ro‘yxatga Oq uy matbuot kotibi Karin Jan-Per ham kirgan. Jurnalist va yozuvchi Enn Applebaum, Politico gazetasi bosh muharriri Metyu Kaminskiy, AQSh Kongressi Vakillar palatasi spikeri Nensi Pelosining turmush o‘rtog‘i – Pol Pelosining ham ro‘yxatda bor. Ularning barchasiga Rossiyaga kirish taqiqlandi.

Avvalroq, 5 sentabr kuni taniqli amerikalik kinoaktyorlar Shon Penn va Ben Stiller Rossiyaga kirishi taqiqlangan shaxslar ro‘yxatiga kiritilgan edi.

Penn va Stiller Rossiya tomonidan urush boshlanganidan keyin Ukrainani ochiq qo‘llab-quvvatladilar. Bundan tashqari, Penn Rossiya bosqinchiligi haqida hujjatli film suratga olishga qaror qildi. Ukraina prezidenti Volodimir Zelenskiy avgust oyi oxirida ikkala amerikalik aktyorni uchinchi darajali "Xizmatlari uchun" ordenlari bilan taqdirladi.

Bungacha, 25 oktyabr kuni Rossiya Yevropa Ittifoqiga a’zo davlatlarning Rossiya hududiga kirishi taqiqlangan vakillari ro‘yxatini kengaytirdi.

Ro‘yxatga, jumladan, Ukrainaga «o‘z mahsulotlarini yetkazib berish bilan shug‘ullanuvchi qurol va harbiy texnika ishlab chiqarish bo‘yicha Yevropa tijorat tuzilmalari vakillari» kiritilgan. «Cheklovlar Yevropa kengashi Parlament assambleyasining alohida deputatlariga ham tegishli», deya bildirdi Rossiya TIV.

30 sentabr kuni AQSh va Buyuk Britaniya Moskvaga qarshi yangi sanksiyalar kiritilishini e’lon qildi. Rossiya Markaziy banki rahbari Elvira Nabiullina Vashington va Londonning sanksiya ro‘yxatiga kiritilgan. Bundan tashqari, Rossiya bosh vaziri o‘rinbosari Aleksandr Novak, Federatsiyalar kengashi a’zolari, shuningdek, mudofaa vaziri Sergey Shoyguning rafiqasi va qizi AQSh cheklov choralari ro‘yxatiga tushdi.

#AQSh #Rossiya