Shols: Putin G20'da tanqidlarni eshitgisi kelmadi

Rossiya prezidenti Vladimir Putin G20 sammitida ishtirok etishi mumkin edi, biroq boshqa davlatlar tomonidan Rossiyani tanqid qilish kuchayib borayotgani sababli bu g‘oyadan voz kechdi. Bu fikrni Germaniya kansleri Olaf Shols 13 noyabr, yakshanba kuni Xanoyda jurnalistlar bilan suhbat chog‘ida bildirdi, uning so‘zlaridan Reuters iqtibos keltirmoqda.

Sholsning so‘zlariga ko‘ra, Putin anjumanga kelsa, «yaxshi bo‘lardi». «Ammo o‘shanda u dunyoning ko‘plab davlatlari tuzgan barcha savollar va tanqidlarga duch kelishi kerak edi. Katta ehtimol bilan u kelmaydi», - dedi Germaniya kansleri.

Ammo Putinning yo‘qligi Rossiyaning Ukrainaga qarshi urushi muhokamasiga ta’sir qilmaydi, dedi Shols. Jahon hamjamiyati Kremlga «harbiy kuchayishga yo‘l qo‘yib bo‘lmasligi va tinchlikni ta’minlovchi takliflar bo‘yicha, shu jumladan, Rossiya rasmiylari, Rossiya prezidenti tomonidan qadamlar qo‘yilishi kerak»ligini ochiq aytdi. «Shuning uchun biz xalqaro qoidalarga rioya qilish, qonun kuchdan ustun turishi kerakligini aniq ko‘rsatuvchi fikrni shakllantirish ustida qattiq ishlayapmiz», — dedi kansler.

Putinning 15—16 noyabr kunlari Bali orolida (Indoneziya) bo‘lib o‘tadigan G20 sammitida ishtirok etishdan bosh tortgani anjumandan bir necha kun oldin ma’lum bo‘ldi. Biroq sammitda uchrashuvlar chog‘ida Ukraina mavzusini ko‘tarishga va’da bergan AQSh prezidenti Jo Bayden, Xitoy yetakchisi Si Jinping va Ukraina prezidenti Volodimir Zelenskiy ishtirok etadi va ishtirokchilarga videomurojaat qiladi.

Sammitda Putin o‘rniga Rossiyadan tashqi ishlar vaziri Sergey Lavrov qatnashadi. Shu bilan birga, iyul oyida G20 sammitiga so‘nggi safari chog‘ida rossiyalik vazir yakkalanib qolgandi – yig‘ilish ishtirokchilari u bilan bir guruh bo‘lib suratga tushmagan, Lavrov esa nutqidan so‘ng darhol majlislar zalidan chiqib ketgan.

Putinning o‘zi urush boshlanganidan beri Rossiyadan tashqariga kamdan-kam chiqyapti - bunday safarlardan biri uning iyul oyida Tehronga qilgan tashrifi bo‘lib, unda Rossiya prezidenti va uning eronlik hamkasbi Ibrohim Raisiy Eronning kamikadze dronlarini yetkazib berish masalasini muhokama qilishgan. 

Oktabr oyida Ostonada bo‘lib o‘tgan Osiyoda hamkorlik va ishonch choralari bo‘yicha kengashning 6-yubiley sammitiga esa Putin oxirgi bo‘lib kelgan edi – shuning uchun Qozog‘iston prezidenti Qosim-Jo‘mart To‘qayev uni kutib olishga chiqmadi. Bundan tashqari, ayrim konferensiya ishtirokchilari Kreml rahbari bilan salomlashmagan.

Oktabr oyida Moskva g‘alla bitimidan bir tomonlama chiqib ketganidan keyin Ukraina Rossiyani G20'dan chiqarishga chaqirdi. Bu g‘oyani AQSh prezidenti Jo Bayden qo‘llab-quvvatlagan va agar bu muvaffaqiyatsizlikka uchrasa, u Ukrainani G20'ga kiritishni taklif qilgan. Shu bilan birga, mamlakat G20'ga a’zo davlatlar ro‘yxatiga kiritilmagan bo‘lsa-da, uning prezidenti Volodimir Zelenskiy yig‘ilishga rasmiy taklif oldi.

Joriy yilning boshida Germaniya kansleri Olaf Shols Rossiya bilan G20 formatini saqlab qolish tarafdori bo‘lgan edi. Biroq, Shols, agar u uchrashuvda ishtirok etsa, sammitda Rossiya prezidenti Vladimir Putin bilan muzokaralar stoliga o‘tirishga rozi bo‘lishi yoki bo‘lmasligini aniq ayta olmadi.