Bolalar dam olishini va sog‘lomlashtirilishini tashkil etish departamenti tuzildi

"Bolalar dam olishlarini tizimli tashkil etish va sog‘lomlashtirish ishlarini yanada takomillashtirishga doir qo‘shimcha chora-tadbirlar to‘g‘risida"gi prezident qarori qabul qilindi.

O‘zbekiston kasaba uyushmalari federatsiyasi tizimida quyidagilar tashkil etiladi: Bolalar sog‘lomlashtirish va aholi salomatligini tiklashga ko‘maklashish jamg‘armasi; Bolalar dam olishini va sog‘lomlashtirilishini tashkil etish departamenti.

Jamg‘arma mablag‘lari hisobidan kasaba uyushmalari a’zolari farzandlari dam olishi va ularni sog‘lomlashtirish xarajatlari bir qismini qoplash maqsadida har bir yo‘llanma uchun BHM 2 baravari (600 ming so‘m), biroq yo‘llanma narxi 50 foizidan oshmagan miqdorda oromgohlarga kompensatsiya to‘lanadi.

2023 yil 1 yanvardan:

• mahalliy budjetlar daromadlari prognozdan oshirib bajarilgan qismi 10 foizi har chorakda jamg‘armaga yo‘naltiriladi;
• davlat organlari va tashkilotlari o‘z xodimlari farzandlari uchun sotib olingan oromgohlar yo‘llanmalari narxi 50 foizigacha, ammo har bir yo‘llanma uchun BHM 1 baravaridan (300 ming so‘mdan) oshmagan qismi ish beruvchilar tomonidan kompensatsiya qilib berilishi mumkin.

Bolalar dam olishlarini tizimli tashkil etish va sog‘lomlashtirish masalalari bo‘yicha respublika komissiyasi tashkil etiladi.