Yerosti suvlariga quduqlar burg‘ilash faoliyatiga ruxsatnoma berish tartibi o‘zgaradi

Vazirlar Mahkamasining “Yerosti suvlariga quduqlar burg‘ilash va ulardan foydalanish munosabatlarini tartibga solishni yanada takomillashtirish chora-tadbirlari to‘g‘risida”gi qarori loyihasi e’lon qilindi.

Belgilab qo‘yilishicha, 2023 yil 1 apreldan boshlab:

• amaldagi yerosti suvlariga quduqlarni burg‘ilash bo‘yicha har bir burg‘ilanadigan quduq uchun bir martalik ruxsatnoma berish tartibi bekor qilinib, o‘rniga yerosti suvlariga quduqlar burg‘ilash faoliyatiga ruxsatnoma berish joriy etiladi;  
• yerosti suvlariga quduqlar burg‘ilash faoliyatiga ruxsatnoma faqat yuridik shaxslarga va yakka tartibdagi tadbirkorlarga beriladi;
• respublika hududiga olib kirilgan yoki ichki bozorda sotib olingan yerosti suvlariga quduqlar burg‘ilash uskunalarini faqat yuridik shaxslar va yakka tartibdagi tadbirkorlar bo‘yicha davlat ro‘yxatiga olinadi;
• davlat ro‘yxatiga olingan yerosti suvlariga quduqlar burg‘ilash uskunalari bo‘yicha bir oy muddatda yerosti suvlariga quduqlar burg‘ilash faoliyatiga ruxsatnoma olish (qayta rasmiylashtirish) shartlari belgilanadi.

Ichki ishlar vazirligi:

• davlat ro‘yxatida qayd etilgan o‘ziyurar, tirkamali va boshqa turdagi yerosti suvlariga quduqlar burg‘ilash uskunalarini Davlat geologiya qo‘mitasi bilan birgalikda xatlovdan o‘tkazishni hamda ular ro‘yxatini shakllantirishni;
• ro‘yxatga muvofiq har bir burg‘ilash uskunasining texnik pasportlarini transport (texnika) turiga ko‘ra alohida tasniflab, bepul tarzda qayta rasmiylashtirishni;
• respublika hududiga olib kirilgan yoki sotib olingan yerosti suvlariga quduqlar burg‘ilash uskunalari faqat yuridik shaxslar va yakka tartibdagi tadbirkorlar bo‘yicha davlat ro‘yxatiga olishni va bu haqda tegishlicha axborotni Davlat geologiya qo‘mitasiga ma’lumotlar bazasiga kiritish uchun taqdim etib borishni;
• 2023 yil 1 apreldan boshlab, yerosti suvlariga quduqlar burg‘ilash uskunalarini davlat ro‘yxatiga qo‘yishda ular uchun yerosti suvlariga quduqlar burg‘ilash faoliyatiga ruxsatnoma olish (qayta rasmiylashtirish) sharti belgilanishini ta’minlaydi.

Yerosti suvlariga quduqlar burg‘ilash faoliyati bilan shug‘ullanuvchi yuridik shaxslar va yakka tartibdagi tadbirkorlar o‘zlari qaramog‘idagi burg‘ilash uskunalari texnik pasportlarini tegishliligicha Ichki ishlar vazirligi hududiy organlarida alohida tasniflagan holda qayta rasmiylashtirish uchun taqdim etadi.