To‘lov tizimi operatorlari ichki nazorat qoidalariga o‘zgartirish kiritiladi

To‘lov tizimi operatori yoki elektron pullar tizimi operatori yoxud to‘lov tashkiloti nazorati ostida yoki ahamiyatli ta’siri doirasida bitta yoki bir nechta pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlar bo‘lgan taqdirda ichki qoidalar guruhiy yondashuv asosida ishlab chiqilishi va quyidagilarni o‘z ichiga olishi kerak:

jinoiy faoliyatdan olingan daromadlarni legallashtirish, terrorizmni moliyalashtirish va (yoki) ommaviy qirg‘in qurolini tarqatishni moliyalashtirish bilan bog‘liq tavakkalchiliklarni boshqarish va mijozlarni lozim darajada tekshirish uchun zarur bo‘lgan ma’lumotlarni almashish qoidalari va tartib-taomillari;

komplayens nazoratni, auditni va (yoki) jinoiy faoliyatdan olingan daromadlarni legallashtirishga, terrorizmni moliyalashtirishga va (yoki) ommaviy qirg‘in qurolini tarqatishni moliyalashtirishga qarshi kurashish funksiyalarini guruh darajasida ta’minlash, jinoiy faoliyatdan olingan daromadlarni legallashtirish, terrorizmni moliyalashtirish va (yoki) ommaviy qirg‘in qurolini tarqatishni moliyalashtirishga qarshi kurashish maqsadlari uchun zarur bo‘lgan hollarda filiallardan va shu’ba korxonalardan ular mijozlari, hisobvaraqlari va operatsiyalari to‘g‘risidagi ma’lumotlar olinishini ta’minlash;

maxfiylikni va ma’lumotlardan foydalanishni yetarli darajada himoya qilish.

Ichki nazorat xizmati rahbari nobank kredit tashkiloti ijro etuvchi (ijroiya) organi a’zosi yoki rahbari o‘rinbosari bo‘lib hisoblanadi.

Yuridik shaxsni tashkil etmagan chet el tuzilmasiga nisbatan ushbu qoidalar bilan yuridik shaxslar uchun o‘rnatilgan talablar qo‘llanadi.

Markaziy bank to‘lov tizimlari operatorlari va to‘lov tashkilotlaridan o‘zlarida o‘tkazilgan tavakkalchiliklarni baholash natijalarini so‘rab olishga haqli.

Shubhali operatsiya haqidagi xabar Ichki nazorat xizmati tomonidan, Vazirlar Mahkamasi qarori bilan tasdiqlangan Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish bilan bog‘liq ma’lumotlarni taqdim etish tartibi to‘g‘risidagi nizom talablariga muvofiq maxsus vakolatli davlat organiga beriladi.

To‘lov tizimlari operatorlari, elektron pullar tizimlari operatorlari va to‘lov tashkilotlarida mas’ul xodim yoki Ichki nazorat xizmati faoliyati ichki audit xizmati yoki tashqi audit tomonidan tekshirib boriladi.