O‘zbekistonda 5,7 mln gektar yaylovlarning qariyb 11 foizi turli darajada degradatsiyaga uchragan

Bugungi kunda mamlakatda tuproq unumdorligini oshirish, uni muhofaza qilish qonun bilan tartibga solinmagani tufayli ko‘plab salbiy holatlar yuzaga kelmoqda. Respublikada o‘rtacha tuproq unumdorligi 1991 yilda 58 ball, 2001 yilda 55 ball, 2011 yilda 53,9 ball, 2021 yilda 53,7 ballni tashkil etyapti.

So‘nggi yillarda olib borilgan tuproq-baholash va tuproqshunoslikka oid tadqiqotlar natijasida sug‘oriladigan yerlar qariyb 53,2 foizi turli darajada sho‘rlangan, geobotanik tadqiqotlar o‘tkazilgan 5,7 mln gektar yaylovlar 10,8 foizi turli darajada degradatsiyaga uchragan. Mazkur holatlar mamlakatda tuproq unumdorligini oshirish va muhofaza qilishni alohida qonun bilan tartibga solish zarurligini ko‘rsatmoqda.

Qonun loyihasida tuproq unumdorligini oshirish va muhofaza qilish, tuproqlar holatini yaxshilash, unumdorligini saqlash, mas’ul vazirlik va idoralar vakolatlari, yerlarni rekultivatsiya qilish, tuproq holati va sifatiga ta’sir qiluvchi loyihalar, vositalar va texnologiyalarni davlat ekspertizasidan o‘tkazish masalalari o‘z aksini topmoqda.

Hujjatda jismoniy va yuridik shaxslar, mansabdor shaxslar g‘ayriqonuniy harakatlari yoki harakatsizligi oqibatida tuproq sifati yoki unumdorligi pasayishi natijasida yetkazilgan zararni qoplash masalalari ham belgilanmoqda.

Deputatlar ta’kidlashicha, qonun loyihasi qabul qilinishi tuproqlar unumdorligini oshirish va muhofaza qilish, toza tuproqda sifatli va xavfsiz mahsulot yetishtirish hamda yaylov o‘simliklari bioxilma-xilligini oshirishga xizmat qiladi.