2030-yilga borib yerlarni tiklash boʻyicha global majburiyatlarni bajarish uchun har yili 355 milliard dollar kerak boʻladi. Bu haqda BMT xabar berdi.
Qayd etilishicha, hozirda umumiy investitsiyalar miqdori taxminan 77 milliard dollarni tashkil etadi, bu esa yillik tafovutni 278 milliard dollarga yetkazyapti. Xususiy moliyalashtirish esa global yerlarni tiklash uchun yoʻnaltirilayotgan mablagʻning atigi 6 foizini tashkil qiladi.
Hozirda yaylov yerlari tashabbusi boshlangan, unga 1,2 milliard dollarlik 45 ta loyiha kiradi. Bu Choʻllanishga qarshi kurash konvensiyasi tarixidagi yaylov yerlarini qoʻllab-quvvatlash uchun resurslarni safarbar qilish boʻyicha eng yirik tashabbusdir.
Bundan tashqari, hukumatlar, rivojlanish banklari, jamgʻarmalar va kompaniyalar besh qitʼadagi 23 ta mamlakat, jumladan, rivojlanishning turli bosqichlaridagi loyihalar uchun 1,3 milliard dollarlik moliyalashtirish portfelini eʼlon qildi. Ushbu summaning 644,5 million dollari yangi moliyalashtirishdir.
BMTga koʻra, hozirda 70 dan ortiq mamlakatda qurgʻoqchilikni boshqarish boʻyicha milliy rejalar mavjud. Biroq, moliyalashtirish koʻlami va amaliy harakatlar muammoni bartaraf qilishga mutonosib emas.
Yerlarning 40 foizigacha degradatsiyaga uchragan, ammo mamlakatlar 2030-yilga borib 1 milliard gektardan ortiq maydonni tiklashga vaʼda bergan.
