12:25 / 21.12.2022
11760

«Prank» video uchun shifokorlarni aldab sog‘lom qo‘lini gips qildirgan o‘smir uzr so‘rab chiqdi

Xorazmlik o‘smir «prank» video olish uchun sog‘lom qo‘lini singan deb ko‘rsatib Yangiariq tuman tibbiyot birlashmasiga borgan. Shifokorlar uning sinmagan qo‘lini gips qilib qo‘yishgan.

Foto: Videodan kadr

Ijtimoiy tarmoqlarda tarqalgan videoda Xorazm viloyatida o‘smir yigit «prank» video qilish uchun Yangiariq tuman tibbiyot birlashmasiga borgani ko‘rsatilgan. Video boshida o‘smir qo‘li sog‘lom, yaxshi ishlab turganini ko‘rsatib, keyin tibbiyot birlashmasiga borgan. Shifokorlar uning sinmagan qo‘lini tekshirib ko‘rib, gips qilib qo‘yishgan.

Videoga izoh yozuvchilarning aksari o‘smir xato ish qilganini aytib, unga salbiy munosabat bildirishgan.

«...sen amallab maktabingni bitir, o‘ynashga boshqa odam qolmadimi?» «...bu bilan shifokorlarning nomi yomonga chiqadi», deb yozib qoldirishgan.

Ayrim foydalanuvchilar bu video shifokorlar orasida e’tiborsiz va bilimsizlari ham borligini ko‘rsatib bergan desa, yana biri «ayrim hollarda rentgenda ko‘rinmagan kichik sinishlar sabab ham har ehtimolga qarshi qo‘l gipsda turgani ma’qul», deyishgan.

Holatga oydinlik kiritish maqsadida Xorazm viloyati hokimligi matbuot xizmati bilan bog‘landik. Lekin bolaning qo‘li gips qilinishidan oldin rentgen qilingan yoki yo‘qligiga izoh berilmadi.

Hokimlik matbuot xizmati izohga qo‘shib, «prank» olgan o‘smirning qilgan ishidan pushaymon ekani va bu holat qaytib takrorlanmasligi haqida chiqargan videosini taqdim qildi. 

“O‘sha paytda rostdan ham qo‘lim og‘rib turgan edi. Videoda yolg‘ondan piar qilish uchun aytdim”, – degan o‘smir videoda.

Mavzuga oid
Top