DXX va Bosh prokuratura lavozimidan ozod etilganlarning faoliyatini tekshiradi

Prezident raisligida energiya resurslari ta’minoti bo‘yicha o‘tkazilgan yig‘ilishda, hokimlar, sektor rahbarlari, mahalla raislari, hokim yordamchilari, yoshlar yetakchilari va xotin-qizlar faollari uyma-uy yurib, aholidan xabar olishlari kerakligi ko‘rsatib o‘tildi.

«Saxovat va ko‘mak» jamg‘armasiga yolg‘iz qariyalar, ko‘p farzandli ehtiyojmand oilalarga issiq kiyim, oziq-ovqat tarqatish, eng og‘ir hollarda ularni sharoiti bor joylarga joylashtirish, mahallalarda issiq ovqat tarqatish punktlarini tashkil etish topshirildi.

Har bir dehqon bozorida sharoitlarni yaxshilash va narx-navoni tartibga solish, yirik korxonalar, ijtimoiy obektlar rahbarlariga xodimlarini uyushgan holda ishga olib kelishga avtobus qatnovlarini tashkil etish vazifasi qo‘yildi.

Yong‘inning oldini olish bo‘yicha amaliy va tushuntirish ishlarini kuchaytirish, xonadonma-xonadon isitish vositalaridan to‘g‘ri foydalanish bo‘yicha tushuntirish ishlarini tashkil qilish bo‘yicha topshiriq berildi.

Avtomobilga gaz quyish shoxobchalarida davom etayotgan o‘g‘riliklarga barham berish shartligi ta’kidlandi.

Misol uchun, o‘tgan haftada birgina Vobkent tumani va Buxoro shahridagi 3 ta shoxobchada 26 million kubmetr (26 milliard so‘mlik) gazdan yashirincha foydalanish holatlari aniqlangan. Ushbu gaz hajmi bilan 44 ming xonadonni yoki bitta katta tuman aholisini 1 oy gaz bilan ta’minlash mumkin edi.

Bosh prokurorning birinchi o‘rinbosari Valiyevga shu masalada tartib o‘rnatish topshirildi.

Umuman, Davlat xavfsizlik xizmati va Bosh prokuraturaga bugun lavozimidan ozod etilgan mutasaddilarning faoliyatini o‘rganish va qonunbuzilishlari aniqlangan taqdirda, qat’iy javobgarlikka tortish topshirildi.

Bugungi yig‘ilishda Toshkent shahri hokimi Jahongir Ortiqxo‘jayev, energetika vaziri o‘rinbosari Sherzod Xo‘jayev va «Issiqlik elektr stansiyalari» AJ raisi Farhod Abdurahmonov lavozimidan ozod etildi. Shuningdek, «Hududiy elektr tarmoqlari» rahbari Ulug‘bek Mustafoyev, «O‘ztransgaz» rahbari Behzod Normatov va «O‘zbekneftgaz» rahbari Mehriddin Abdullayev ham lavozimidan ozod etilib, ularga vazifasini bajaruvchi lavozimida 3 oy sinov muddati belgilandi.

Yig‘ilish yakunida tegishli mutasaddilar va hududlar hokimlari hisobot berdi.