Inson resurslarini boshqarishga mo‘ljallangan yagona platforma ishga tushirildi

Inson resurslarini rivojlantirish yo‘nalishidagi byurokratik to‘siqlarga chek qo‘yish hamda korrupsiyaviy xavf-xatarlar va inson omilini qisqartirish maqsadida hrm.argos.uz avtomatlashtirilgan elektron dasturi ishlab chiqildi. Bu haqda Prezident huzuridagi Davlat xizmatini rivojlantirish agentligi direktorining birinchi o‘rinbosari Otabek Hasanov ma’lum qildi.

Ta’kidlanishicha, platforma Davlat fuqarolik xizmatchilari vakant lavozimlarining yagona ochiq portali — vacancy.argos.uz hamda Yagona milliy mehnat tizimi — my.mehnat.uz elektron dasturlari bilan integrallashgan. Xodimlar va mehnatga doir ma’lumotlar avtomatik tarzda ushbu dasturda shakllanadi.

Mazkur avtomatlashtirilgan tizim 2023 yil 1 yanvardan davlat fuqarolik xizmati tatbiq etiladigan barcha davlat organlari va tashkilotlarida joriy etilishi ko‘zda tutilgan.

Buning natijasida davlat organlari va tashkilotlarining inson resurslarini rivojlantirish bo‘linmalari byurokratiya va ortiqcha qog‘ozbozlikdan xoli bo‘lgan quyidagi qulayliklarga ega bo‘ladi:

– vakant lavozimlarni e’lon qilishdan tortib, ishga qabul qilish natijalari bo‘yicha hujjatlarni rasmiylashtirishgacha bo‘lgan jarayonlar to‘liq elektron tarzda amalga oshiriladi;

– tarkibiy tuzilma, shtatlar, lavozimlar va xodimlar to‘g‘risidagi ma’lumotlar yagona elektron bazaga jamlagan holda axborot to‘planadi va unga ishlov beriladi;

– xodimlar davomati va ish vaqti hisobi tabeli, shuningdek, xizmat safari, mehnat ta’tili, mehnatga layoqatsizlik davri elektron shaklda qayd etib boriladi;

– kadrlarga oid ish yurituv hujjatlari elektron raqamli imzo bilan tasdiqlangan holda faqat tizim orqali elektron shaklda qabul qilinadi va yuritiladi;

– xodimlarning ish faoliyati samaradorligini avtomatik baholash va ularni masofaviy malakasini oshirishga erishiladi;

– kadrlar bo‘yicha ma’lumotlarning elektron arxivi yuritiladi.