Facebook va Instagram pulli verifikatsiyani joriy qiladi

Meta korporatsiyasi o‘zining Facebook va Instagram ijtimoiy tarmoqlarida pulli verifikatsiyani joriy etishni sinovdan o‘tkazishni boshlaydi. Bu haqda The Verge xabar berdi.

«Bu hafta biz Meta Verified obuna xizmatini yo‘lga qo‘yishni boshlayapmiz. Bu sizga hujjatlaringiz orqali shaxsingizni tasdiqlash, ko‘k belgini olish va sizga taqlid qiladigan akkauntlardan qo‘shimcha himoyalanish, shuningdek, qo‘llab-quvvatlash xizmatidan birinchi navbatda foydalanish imkonini beradi», deb yozdi Meta bosh direktori Mark Tsukerberg Instagram sahifasida.

Pulli verifikatsiya faqat 18 yoshdan oshgan Facebook va Instagram foydalanuvchilari uchun joriy etiladi. Uning narxi sayt orqali sotib olinganda oyiga $11,99, mobil ilova orqali xarid qilinganda esa oyiga $14,99 turadi. Bu haftada yangi funksiya Avstraliya va Yangi Zelandiyada, tez orada esa boshqa mamlakatlarda ham ishga tushiriladi, deb va’da berdi Tsukerberg.

Meta Verified funksiyasi 2022 yil noyabrida Twitter tomonidan joriy qilingan pulli verifikatsiyaga o‘xshash. Shu vaqtda Twitter oyiga 8 dollar evaziga verifikatsiyani anglatuvchi ko‘k belgini sotib olish imkoniyatini ishga tushirgan edi. Ammo, soxta akkauntlar uni sotib olishni boshlagani sababli funksiyani to‘xtatishga majbur bo‘ldi. Dekabr oyida funksiya qayta ishga tushirildi.

The Verge nashrining yozishicha, Meta platformasining pulli tekshiruvga yondashuvi bir qarashda Twitter tarmog‘inikidan jiddiyroq ko‘rinadi, chunki Meta verifikatsiya uchun hujjat so‘raydi (Twitter verifikatsiyasi uchun faqat telefon raqami kifoya) va soxta akkauntlardan himoyalanish bo‘yicha qo‘shimcha choralarni va’da qiladi. Biroq, bu choralar nima ekanligi hozircha aniq emas.