O‘zbekistonda «Yandeks.Taksi» faoliyatining raqobat me’yorlariga muvofiqligi tekshiriladi

O‘zbekiston Raqobatni rivojlantirish va iste’molchilar huquqlarini himoya qilish qo‘mitasi «Yandeks.Taksi» xizmati agregatori ishida bozorda ustunlik belgilari mavjudligini tekshiradi. Bu haqda Interfax xabar berdi.

Qayd qilinishicha, 2022 yil oktyabr oyida qo‘mita taksi xizmatlari agregator bozorini to‘liq tahlil qilishni boshlagan. 2023 yil fevral oyida «Yandeks Go» xizmati asoschilari - Yandex N.V. (Niderlandiya), Yandex Europe AG (Shveytsariya) va Ridetech International B.V. (Niderlandiya) kompaniyalariga so‘rov yuborilgan.

Qo‘mita 2022 yil uchun ilovadan foydalanuvchilar (haydovchilar va mijozlar) soni, tranzaksiyalarning umumiy soni va yo‘lovchilar oqimi, xizmatlar aylanmasi hamda «Yandeks Go» xizmati va taksi kompaniyalari tomonidan olingan komissiyalar miqdori va taqsimoti to‘g‘risidagi ma’lumotlarni so‘ragan.

Qo‘mitaga ko‘ra, «Yandeks Go» xizmati ta’sischisining xorijda ro‘yxatdan o‘tgani uning faoliyatini monopoliyaga qarshi tartibga solishda muayyan qiyinchiliklar tug‘dirmoqda.

«Tahlil natijalari qo‘mita tomonidan ommaviy axborot vositalari orqali qo‘shimcha ravishda e’lon qilinadi», deya ma’lum qilgan Raqobat qo‘mitasi matbuot xizmati.

«Yandeks Go» kompaniyasi vakilining tushuntirishicha, bunday so‘rovlar dunyo amaliyotida uchrab turadigan an’anaviy holat.

«Ko‘rib chiqilayotgan so‘rov O‘zbekiston monopoliyaga qarshi departamenti tomonidan taksi xizmatlari agregator bozorini tahlil qilish doirasida yuborilgan. Biz qo‘mita bilan aloqadamiz va hamkorlikka tayyormiz, javoblarni o‘z vaqtida va to‘liq hajmda beramiz», deyiladi kompaniya matbuot xizmati xabarida.

2022 yil aprel oyida O‘zbekiston Axborot texnologiyalari va kommunikatsiyalarini rivojlantirish vazirligi «Yandeks.Taksi»ga Toshkentdagi IT-parkning rezidenti bo‘lishni taklif qilgan edi.

«Yandeks.Taksi» O‘zbekistonda 2018 yil aprel oyidan boshlab ishlamoqda. Xizmat Toshkent va yana beshta shaharda mavjud.