Harbiy ekspert: Ukraina oktyabr oyidayoq g‘alaba qozonadi

Rossiya armiyasi shu qadar ayanchli ahvoldaki, u shu yil oktyabr oyidayoq Ukrainada mag‘lubiyatga uchraydi. Bu fikrni 4 aprel kuni Germaniyaning «Ikkinchi» telekanaliga bergan intervyusida Tsyurix oliy texnik maktabi qoshidagi Harbiy akademiyada dars beruvchi harbiy va iqtisodiy ekspert Markus Koyp aytib o‘tdi. 

Uning so‘zlariga ko‘ra, Ukrainadagi janglarda Rossiya allaqachon 10 mingga yaqin og‘ir harbiy texnika va tanklarni yo‘qotgan. Bunday yo‘qotishlar ko‘lami bilan Rossiya uzoqqa bora olmaydi. «Aslida ularning (Rossiya armiyasining) zaxiralari tugashi vaqt masalasi», — dedi Koyp. 

Rossiyaning qishki harbiy kampaniyasi natijalarini sharhlar ekan, ekspert ularni «falokatli» deb atadi. Uning so‘zlariga ko‘ra, ommaviy axborot vositalari faqat Baxmut atrofidagi vaziyatga e’tibor berishyapti, ammo Rossiya yana to‘rtta yo‘nalishda - Kreminniy, Avdiyivka, Marinka, Vuhledarda hujum qilishga uringan. «Buning harbiy mantiqqa hech qanday aloqasi yo‘q, - deydi Markus Koyp. - Bu minimal olg‘a siljish yo‘lida moddiy va insoniy zaxiralarni yo‘qotishdir».

Eski T-55 va T-64 tanklarining Rossiyada qayta foydalanishga olinib, frontga jo‘natila boshlanganini nemis harbiy eksperti «texnologik regressiyaning kuchayishi» deb atadi. 2014 yilda taqdim etilgan T-14 «Armata» tanki esa hozirgacha faqat harbiy paradlarda ko‘rilgan, ammo Ukrainadagi jang maydonida payqalmadi, dedi Koyp. 

Frontdagi vaziyat va Rossiya harbiy-sanoat kompleksining imkoniyatlarini tahlil qilgandan so‘ng, harbiy iqtisod bo‘yicha mutaxassis oktyabr oyigacha Rossiya armiyasining zaxiralari tugaydi, degan xulosaga keldi. Keyingi harbiy harakatlar haqida esa gap bo‘lishi mumkin emas, deb qo‘shimcha qildi u. 

Ukraina armiyasi, uning ta’kidlashicha, eski sovet harbiy texnikasidan zamonaviy g‘arb texnikalariga, xususan, tanklar va zirhli transportyorlarga - Amerikaning Bradley va Germaniyaning Marder’iga muvaffaqiyatli o‘tmoqda. Ushbu texnologik ustunlik Ukraina qarshi hujumi paytida o‘zini namoyon qiladi, Koyp bu aprel oyining o‘rtalarida boshlanishini kutmoqda.