Advokat: Italiyadan qochgan gubernator Ussning o‘g‘li - Rossiyada

Artem Uss ixtiyoriy ravishda Rossiya Ichki ishlar vazirligining Moskvadagi tergov bo‘limiga ko‘rsatma berish uchun keldi. Shundan so‘ng uning ehtiyot chorasi chetga chiqmaslik to‘g‘risidagi yozma majburiyatga o‘zgartirildi, deya xabar berdi uning advokati.

Artem Uss

Krasnoyarsk o‘lkasi gubernatori Aleksandr Ussning o‘g‘li, mart oyida Italiyada o‘ziga tayinlangan uy qamog‘idan qochib ketgan tadbirkor Artem Uss hozir Moskvada. 4 aprel, seshanba kuni uning advokati Aleksey Tixomirov xabar berishicha, erkak o‘z ixtiyori bilan Rossiya Ichki ishlar vazirligining tergov boshqarmasiga kelgan va «ishning mohiyati bo‘yicha berilgan savollarga batafsil javob bergan».

So‘roq natijalariga ko‘ra, unga nisbatan ehtiyot chorasi boshqa joyga ketmaslik to‘g‘risida yozma majburiyatga o‘zgartirildi, deya qo‘shimcha qildi advokat.

2022 yil 17 oktyabrda Artem Uss Turkiyaga uchib ketmoqchi bo‘lgan Milan aeroportida AQSh tomonidan hibsga olish orderi asosida ushlangan edi. Amerika rasmiylari Krasnoyarsk o‘lkasi gubernatori o‘g‘lini sanksiyalarni buzish va pul yuvishda aybdor deb hisoblayapti.

2022 yil 28 oktyabrda Moskvaning Meshchanskiy sudi Artem Ussni uyushgan jinoiy guruh tarkibida pul yuvish bo‘yicha qo‘zg‘atilgan ish doirasida sirtdan hibsga oldi. Rossiya hukumati uning ekstraditsiyasini talab qilishini bildirdi.

21 mart kuni Milan apellyatsiya sudi kichik Ussni AQShga ekstraditsiya qilishni ma’qulladi. Ertasi kuni Italiyaning La Stampa gazetasi o‘sha paytda uy qamog‘ida bo‘lgan erkak elektron bilaguzugini sindirib, Milan chekkasidagi ijaraga olgan kvartirasini tashlab ketgani haqida xabar berdi.

Italiyaning Corriere della Sera va La Repubblica gazetalari 28 mart kuni yozishicha, tergov Rossiya maxsus xizmatlari Ussning qochib ketishiga aloqadorligini istisno etmayapti.