Shavkat Mirziyoyevga Turkiyaning birinchi milliy elektromobili topshirildi

O‘zbekiston prezidenti Shavkat Mirziyoyev 12 aprel kuni Turkiya sanoat va texnologiyalar vaziri Mustafo Varank boshchiligidagi delegatsiya bilan uchrashdi.

Uchrashuv kun tartibidan amaliy hamkorlikni kengaytirish, kooperatsiya loyihalarini qo‘llab-quvvatlash va ilgari surish, innovatsiyalar va ilg‘or texnologiyalarni joriy qilish masalalari hamda O‘zbekiston-Turkiya keng ko‘lamli strategik sheriklik munosabatlarini mustahkamlashning boshqa jihatlari o‘rin oldi.

Turkiya prezidenti Rajab Toyyib Erdo‘g‘anning topshirig‘iga binoan mamlakatga kelgan delegatsiya tashrifining maqsadi - Togg brendi ostida ishlab chiqarilgan birinchi milliy elektromobilni namoyish etish va topshirish.

Davlat rahbari ikki tomonlama hamkorlikda bugungi jadal sur’atni, barcha darajalarda o‘zaro muloqot va almashinuvlar faollashganini alohida qayd etdi. Bunga misol tariqasida tovar ayirboshlash hajmi barqaror oshib borayotgani, ustuvor tarmoqlarda bir qator yirik investitsiya loyihalari birgalikda amalga oshirilayotgani, mamlakatlar o‘rtasida muntazam aviaqatnovlar ko‘paygani ta’kidlandi.

Turkiyaning yetakchi kompaniyalarini qo‘shma, shu jumladan avtomobil sanoatidagi loyihalarni amalga oshirishga jalb qilish orqali sanoat kooperatsiyasini rivojlantirish uchun keng imkoniyatlar borligi ko‘rsatib o‘tildi. Oliy darajadagi Strategik sheriklik kengashining navbatdagi yig‘ilishiga puxta tayyorgarlik ko‘rish, jumladan, istiqbolli loyihalar portfelini shakllantirish va uzoq muddatli sanoat dasturini qabul qilish masalalariga alohida e’tibor qaratildi.

Uchrashuv yakunida Togg elektromobilining taqdimoti bo‘lib o‘tdi. Vazir Mustafo Varank avtotransport vositasining texnik ko‘rsatkichlari to‘g‘risida batafsil ma’lumot berib, uning kalitini tantanali ravishda topshirdi.

Mamlakat yetakchisi minnatdorlik bildirib, Turkiya prezidenti va xalqini mashinasozlik tarmog‘ida erishilgan ulkan muvaffaqiyat – elektromobillarni ishlab chiqarish yo‘lga qo‘yilgani bilan qutladi.

Davlat rahbari Turkiyada birinchilardan bo‘lib ishlab chiqarilgan ushbu elektromobil ruliga o‘tirib, uni haydab ko‘rdi.