Eron – O‘zbekiston logistika markazi barpo etiladi

Eron bilan transport sohasida hamkorlikni rivojlantirish bo‘yicha kelishuvlarga erishildi.

Joriy yiling 18 iyun kuni O‘zbekiston transport vaziri Ilhom Mahkamov Eron yo‘l va shaharsozlik vaziri Mehrdod Bazrposh bilan uchrashdi.

Uchrashuvda tomonlar transport sohasidagi o‘zaro manfaatli hamkorlikni kuchaytirish, transport koridorlarini rivojlantirish, ushbu yo‘nalishda mavjud imkoniyatlardan samarali foydalanish bilan bog‘liq jihatlarni muhokama etdi.

Tomonlar «O‘zbekiston – Turkmaniston – Eron» uch tomonlama multimodal transport koridorini rivojlantirish va foydalanish bo‘yicha o‘zbek tomonidan taqdim qilingan bitimni tez orada kelishish, avtomobil transportida yuk tashuvlari jarayonida Eron tomonidan o‘zbek milliy tashuvchilaridan undirilayotgan yig‘imlarni paritet asosida kamaytirish, yoqilg‘i solig‘i yig‘imlarini ham boshqa davlatlarniki bilan tenglashtirish bo‘yicha kelishuvga erishdi.

Shuningdek, tomonlar mamlakatlar o‘rtasida savdo-sotiq munosabatlarini yanada rivojlantirish, yuk tashuvlari hajmini keskin oshirish maqsadida Eron – O‘zbekiston logistika markazini barpo etish, qolaversa, Eron hududida joylashgan Chobahor va Bandar-Abbos portlari hududida o‘zbek tadbirkorlari ishtirokida terminallar va omborlar qurish xususida kelishib oldi.