Qamchiqda yuk avtomobili yo‘l chetidagi xandaqqa tushib ketdi

Kecha, 18 iyun A-373 avtomobil yo‘lining Qamchiq dovoni qismi 266,4-kilometrida yo‘l-transport hodisasi sodir bo‘ldi.

Favqulodda vaziyatlar vazirligi xabariga ko‘ra, Toshkent-Vodiy yo‘nalishida harakatlangan yuk avtomobili haydovchisi boshqaruvni yo‘qotishi natijasida yuk avtomobili yo‘l chetidagi xandaqqa tushib, yonboshlab qolgan.

Zudlik bilan voqea joyiga «Qamchiq» maxsus qidiruv, yong‘in-qutqaruv boshqarmasi qutqaruvchilari hamda YPX xodimlari yetib borgan va avtomobilda yuzaga kelishi mumkin bo‘lgan yong‘inning oldi olinib, haydovchi va uning yo‘lovchisi hayoti saqlab qolingan. 

Shundan so‘ng, ularga birinchi tibbiy yordam ko‘rsatilib, tez tibbiy yordam avtomashinasida Pop tumani shifoxonasiga olib ketilgan.