Shavkat Mirziyoyev: Navoiyda bog‘cha qamrovi 100 foizga yetkaziladi, 30 nafardan ko‘p bola ta’lim oladigan birorta sinf qolmaydi

Ta’lim

Kun.uz muxbirining xabar berishicha, kelgusi yetti yilda Navoiy viloyatidagi oilalarning maktabgacha ta’limga bo‘lgan ehtiyoji hozirgi 82 foizdan 100 foizga to‘liq qoplanadi. Shu maqsadda viloyatdagi barcha mahallalarda jami 310 ta davlat va xususiy bog‘chalar tashkil etiladi. Bunga barcha manbalar hisobidan 1,5 trillion so‘m yo‘naltiriladi.

Bundan tashqari, 2030 yilga qadar yangi maktablar barpo etish va mavjudlarining quvvatini oshirish hisobiga, qo‘shimcha 40 ming o‘quvchi o‘rni yaratiladi. Natijada, viloyatda 30 nafardan ko‘p bola ta’lim oladigan birorta sinf qolmaydi (hozirda bunday sinflar soni 1 ming 200 ta).

“Viloyatdagi barcha maktablar zamonaviy kompyuter sinflari va o‘quv laboratoriyalari bilan ta’minlanadi. Navoiyning iqlimini hisobga olgan holda, barcha bog‘cha va maktablar filtrlangan ichimlik suvi bilan to‘liq ta’minlanadi” dedi nomzod.

Uy-joy qurilishi

Shavkat Mirziyoyev o‘z nutqi davomida kelgusi yetti yilda aholining turmush sharoitlarini yaxshilashga oid rejalari bilan tanishtirdi. Keltirilishicha:

• viloyatda 30 ming oilaga mo‘ljallangan 350 ta ko‘p qavatli uylar barpo etiladi;
• 45 ming oila istiqomat qiladigan 1 ming 200 ta ko‘p qavatli uylar ta’mirlanadi;
• bu ishlarni amalga oshirish uchun barcha manbalar hisobidan Navoiy viloyatining o‘ziga 1 milliard dollar yo‘naltiriladi;
• 3,5 ming kilometr ichki yo‘llar, 60 dan ziyod ko‘priklar quriladi va ta’mirlanadi;
• eskirgan 5 ming kilometr elektr tarmoqlari va 1 ming 200 ta transformator yangilanadi;
• 1 ming kilometr suv tarmoqlari o‘tkazilishi natijasida 100 ming aholi ilk bor ichimlik suvi bilan ta’minlanadi va suv ta’minoti darajasi 85 foizga yetadi.

Ekologiya

Navoiyda ekologik vaziyatni yaxshilash maqsadida kelgusi yetti yilda 120 million tup daraxt ekiladi. Shu o‘rinda: “Buyuk bobokalonimiz Navoiyga cheksiz hurmatimiz belgisi sifatida, viloyatning 5 ta tuman va shahrida “Xamsa”dagi dostonlar nomi bilan ataladigan beshta ekobog‘ yaratsak, nima deysizlar?”, dedi nomzod.

Suv ta’minoti

Suv xo‘jaligidagi islohotlar uchun kelgusi yetti yilda Navoiyga 2,5 trillion so‘m yo‘naltiriladi. Suv ta’minoti eng og‘ir bo‘lgan Qiziltepa, Xatirchi va Karmana tumanlarida 8 ming gektar maydonlar yopiq quvurli sug‘orish tizimiga o‘tkaziladi. Bunga 150 milliard so‘m beriladi. Birgina shuning o‘zida, sug‘orishga sarflanadigan 200 million kub metr suvning 40 foizi tejaladi.

“Suv resurslarini tejash, ulardan samarali foydalanish bo‘yicha katta islohotlarni amalga oshiramiz. Bu ishlar o‘z-o‘zidan bo‘lmaydi, juda ko‘p mablag‘ kerak, lekin, qanchalik qiyin bo‘lmasin, bunga barcha kuch va vositalarni safarbar qilamiz.

Bundan tashqari, Navoiydagi mavjud kanallarning 150 kilometr qismi beton qoplamaga o‘tkaziladi, 125 kilometr drenaj tarmoqlari rekonstruksiya qilinadi. Bunga 300 milliard so‘m ajratiladi”, dedi Shavkat Mirziyoyev.