Toshkent shahar Madaniyat boshqarmasiga yangi rahbar tayinlangani ma’lum bo‘ldi

May oyi oxirida Toshkent shahar Madaniyat va turizm bosh boshqarmasiga yangi rahbar tayinlangani ma’lum bo‘ldi. Madaniyat va turizm vazirligining xabariga ko‘ra, ushbu lavozimga Sanjar Tojiyev tayinlangan. U tayinlovga qadar shu boshqarma boshlig‘ining 1-o‘rinbosari lavozimida ishlagan.

Bungacha mazkur lavozimni Abduvahob Saxiyev egallab kelayotgandi. U sud hukmi bilan jazoga tortilib, mansabdor bo‘lish huquqidan mahrum qilinsa-da, ma’lum muddat lavozimida qoldi. 

Jinoyat ishlari bo‘yicha Mirobod tuman sudining 2022 yil noyabr oyidagi hukmiga ko‘ra, Abduvahob Saxiyev hamda boshqarma bosh hisobchisi Feruza Umarovaga nisbatan Jinoyat kodeksining 184-1-moddasi 2-qismi (juda ko‘p miqdorda budjet va smeta-shtat intizomini buzish)da nazarda tutilgan jinoyatni sodir etganlikda aybdor deb topilgan.

Abduvahob Saxiyevga bazaviy hisoblash miqdorining 60 baravari miqdorida jarima hamda Jinoyat kodeksining 45-moddasiga asosan 1 yil muddatga davlat organlarida rahbarlik lavozimlarida ishlash huquqidan mahrum qilish jazosi tayinlangan. Joriy yil 14 mart kuni ishni qayta ko‘rib chiqqan Toshkent shahar sudining jinoyat ishlari bo‘yicha sudlov hay’ati apellyatsiya shikoyatini qanoatlantirmagan, birinchi instansiya sudi hukmini o‘zgarishsiz qoldirgan. Mazkur ish kassatsiya tartibida qayta ko‘rilayotgandi, ammo natijasi haqida jamoatchilikka ma’lum qilinmadi.

Toshkent shahar madaniyat bosh boshqarmasi 2022 yilning ikkinchi yarmida, Abduvahob Saxiyevning rahbarligi davrida tanlovsiz shartnomalar va post-faktum tenderlar bilan “tilga tushgandi”. Ushbu masalada surishtiruv olib borgan Kun.uz jurnalisti poytaxt hokimligi 6 ta festival uchun 18,2 mlrd so‘m sarflagani, qator shartnomalar tendersiz tuzilgani, qo‘shimcha ravishda o‘tkazilgan tenderlar festivallar o‘tib bo‘lganidan bir necha oy keyin tashkil etilgani va ularda ham to‘g‘ridan to‘g‘ri shartnomani olgan firmalar g‘olib deb topilgani haqida yozgandi. 

Ko‘p o‘tmay Bosh prokuratura ushbu holatda amalda bajarilmagan ishlar va ko‘rsatilmagan xizmatlar uchun 8 mlrd so‘mlik budjet mablag‘lari talon-toroj qilingani haqida xabar bergandi.