Hasharda bitayotgan maktab: Bog‘doddagi ta’lim dargohi bu yil ishga tushadimi?

Farg‘ona viloyati Bog‘dod tumanidagi Bolg‘oli qishlog‘ida maktab yo‘q, 350 nafar o‘quvchi olisdagi ta’lim muassasasiga qatnab o‘qiydi. Yechim sifatida 2021 yilda qishloqdagi har bir xonadondan 500 ming so‘mdan pul yig‘ilib, hashar yo‘li bilan maktab qurilishi boshlangan. Ammo binoning asosiy qismi qurib bitkazilgan bir vaziyatda mablag‘ yo‘qligi sabab ish to‘xtab qolgan. Qishloq ahli mutasaddilardan ta’lim dargohini yangi o‘quv yiligacha bitkazib berishni so‘ramoqda.

{Yii::t(}

O'tkazib yuborish 6s

O'tkazib yuborish

Tahririyatimizga kelgan murojaatga ko‘ra, Bog‘dod tumani “Qo‘g‘oli” MFY Bolg‘oli qishlog‘i bolalari olisda joylashgan 23- va 30-maktablarga qatnab o‘qishadi.

Ma’lum bo‘lishicha, maktab qurilishi uchun yig‘ilgan puldan tashqari qishloq ahli “Tashabbusli budjet”da g‘olib bo‘lgan: 960 mln so‘m mablag‘ evaziga ta’lim dargohining tomi yopilib, pol qismi bitkazilgan, eshik-derazalar sotib olingan. Bundan tashqari, qurilish ishlari bilan tanishgan viloyat hokimi Xayrullo Bozorov maktab uchun sport zali va suv inshooti qurib bergan.

Bolg‘oli qishlog‘ida 450 dan ortiq xo‘jalik bor. Har bir oiladan kamida 2 o‘quvchi 3 km yo‘l yurib maktabga qatnab o‘qishadi. Hashar yo‘li bilan bunyod etilayotgan maktabning deyarli 90 foiz qismi bitgan.

Eng asosiy masala isitish tizimi, tashqi fasad qismi va obodonlashtirish ishlarini yakuniga yetkazib, maktabni yangi o‘quv yiliga foydalanishga topshirish kechikyapti. Bu borada ota-onalarning yordam so‘rab bormagan idorayu tashkiloti qolmagan.

Mahalla faoli Ubaydullo Imomaliyev bolg‘oliliklar maktabning ishga tushishini intiq kutayotganini ta’kidladi.

“Bolg‘oli qishlog‘idagi yangi maktabni qurish uchun har bir xo‘jalikdan 500 ming so‘mdan pul yig‘dik. Astoydil harakat qilib open budjet loyihasida g‘olib bo‘lib tomini yopib, suvog‘igacha qilib qo‘ydik. Farzand, nevaralarimiz Katta Farg‘ona kanali ko‘prigidan o‘tib 30- va 23-maktablarda ikki smenada o‘qib kelishadi. Qish kunlari ayniqsa maktabga qatnash ancha mushkul. Ta’lim dargohining 90 foiz qismi bitdi hisob, qolganiga qishloq ahlining qurbi yetmay qolgan. Sentyabr oyiga bitkazib o‘quvchilarni yangi maktabga jalb qilsak o‘quvchilar xursand bo‘lar edi. Maktab hashar yo‘li bilan bitgan. 350o‘ringa mo‘ljallangan maktab bitib qolsa yoshlarimizning og‘iri yengil bo‘lar edi”, deydi Ubaydullo Imomaliyev.

Murodjon Ziyovutdinov mablag‘ yetishmasligidan maktab qurilishi to‘xtab qolgani haqida gapirib berdi.

“Maktabimiz shu holatga kelgunicha ancha ter to‘kdik. 2021 yilda sobiq hokim Vosiljon Nazarovni olib kelib yerga qoziqni qoqib ishni boshlaganmiz. Pul yig‘ib, homiylar topib 2 yil davomida maktabning asosini bitirib oldik. Hozirgi kunda binoning tashqi fasadi, isitish tizimi va maydonlarni obodonlashtirish ishlari qolgan. O‘tgan yili bitishi kerak bo‘lgan maktab mablag‘ yetishmasligidan boshi berk ko‘chaga kirib qolgan.

Prezidentimiz 2023 yil sentabrgacha bir smenada bo‘lishi lozimligini aytgan. Qishlog‘imizda ikki qo‘shimcha filial bo‘lib turib o‘quvchilar ikki smenada o‘qishyapti. Bolalar uyga kech soat 20:00-21:00larda kirib kelyapti. Qishloqda 350 nafar o‘quvchilar boshqa hududga borib o‘qib kelishyapti. Barcha maktab sentabr oyiga ochilishini kutyapti. Maktab uchun parta, stol-stullargacha kelgan. Maktab hovlisini asfaltlash, stadion qurish, fasad qismini va issiqlik ta’minotini bajarsak maktabimiz ishga tushadi. Lekin mablag‘ yetishmasligi bizni qiynayapti”, deydi Murodjon Ziyovutdinov.

“Maktabni shu darajaga olib kelguncha aholi ancha mablag‘ sarfladi. Mutasaddilardan 2023 yil sentabr oyiga maktabimizni bitirib berishlarini iltimos qilamiz. Yordam so‘rab bormagan joyimiz qolmadi. Qishloq bolalari Farg‘ona kanali va poyezd yo‘lidan o‘tib olisdagi maktablarda o‘qib kelishadi. Qish faslida tuman va yog‘ingarchilikda ayniqsa farzandlarimiz qiynalishyapti. Hashar yo‘li bilan bitay deb qolgan maktab ochilishi negadir kechikyapti. Vosiljon Nazarov hokimlik qilgan paytda 30 tonna sement, 30 million so‘mlik armatura, 100 mingta g‘isht olib berilgan edi. Har bir oila 500 ming so‘mdan pul yig‘ib maktab qurilishini boshlagan edik. Open budjetda yutgan pulimizga shifer, eshik-derazalarini olib kelib o‘rnashtirdik. Qo‘shimcha qurilish ishlariga mablag‘imiz ham kuchimiz ham qolmadi”, deydi mahalla faollaridan yana biri Solijon Tursunov.

Bog‘dod tumani Maktabgacha va maktab ta’limi bo‘limi rahbari Sharifjon Uraimovdan holat bo‘yicha izoh oldik. U maktab yangi o‘quv yiligacha to‘liq foydalanishga topshirilishiga va’da berdi.

“330o‘ringa mo‘ljallangan 30-maktab filialining 95 foizi bitgan. 200 million so‘m mahalliy budjetdan mablag‘ ajratilgan. Iyul oyi oxiri avgust oyidan maktabning fasad qismini pardozlash ishlari boshlanadi. Maktab sentabr oyida to‘liq ishga tushadi. Bu bo‘yicha hech qanday muammo yo‘q. Sababi ajratilgan pul aniq, manbasi bor. Faqat pul ajratilib ishchi kuchini tashlasak maktab to‘liq bitadi. 2023 yil sentabrdan o‘quvchilar shu maktabda tahsil oladi”, deydi Sharifjon Uraimov.

Bog‘dod tumani hokimi o‘rinbosari Qahramon Mirtazoqulov Bolg‘oli qishlog‘i aholisi tomonidan hashar yo‘li bilan bitkazilayotgan maktab haqida ma’lumotga ega ekani, ta’lim dargohini sentabr oyiga foydalanishga topshirishga hokimlik tomonidan harakat bo‘layotganini ta’kidladi.

Kun.uz muxbiriga mutasaddilar ta’lim dargohi sentabr oyida ishga tushishiga va’da berishdi. Kun.uz maktab bilan bog‘liq holatni kuzatishda davom etadi.

Sarvar Ziyoyev, Kun.uz
Montaj ustasi: Boymirza Xalilov