Ozodbek Nazarbekov madaniyat vaziri lavozimiga tasdiqlandi, turizm sohasi Abduhakimovga qaytgan

Prezident Shavkat Mirziyoyevning tegishli farmoni bilan Ozodbek Nazarbekov O‘zbekiston Respublikasi madaniyat vaziri lavozimiga tasdiqlandi. Bu haqda prezident matbuot kotibi Sherzod Asadov o‘z telegram-kanalida xabar bergan.

Shu tariqa, endi u turizm sohasiga javob bermaydi.

Ozodbek Nazarbekovning nomzodi Oliy Majlis Qonunchilik palatasi deputatlari tomonidan ma’qullangan.

«Oliy Majlis Qonunchilik palatasining navbatdagi majlisida deputatlar O‘zbekiston Respublikasi madaniyat vaziri lavozimiga Ozodbek Nazarbekov nomzodini ko‘rib chiqdilar. 

Majlisda O.Nazarbekov madaniyat sohasidagi islohotlarning samaradorligini ta’minlash maqsadida kelgusida amalga oshiriladigan ishlari bo‘yicha o‘z Harakatlar dasturi haqida axborot berdi.

Deputatlar O.Nazarbekov nomzodini O‘zbekiston Respublikasi madaniyat vaziri lavozimiga ma’qulladilar», deyiladi xabarda.

Ozodbek Nazarbekov 2020 yil yanvarida madaniyat vaziri lavozimini egallagandi.

2022 yil oxiridagi ma’muriy islohotlar paytida Madaniyat va turizm vazirligi tashkil etilgan va Nazarbekov madaniyat va turizm vaziri lavozimiga tayinlagan edi.

Kun.uz manbasiga ko‘ra, turizm sohasi yana ayni vaqtda ekologiya va iqlim vaziri bo‘lib turgan Aziz Abduhakimovga qaytmoqda.