Qazib tashlangan Toshkent, ildizidan chopilgan daraxtlar – poytaxtning bu holati qachon o‘nglanadi?

O‘tgan qishda poytaxt Toshkentdagi elektr uzatish bilan bog‘liq muammolar ortidan shaharni uzluksiz elektr bilan ta’minlash masalasi yuzaga chiqdi. Shundan so‘ng bir necha oyki, Toshkentning istalgan qismida “Hududiy elektr tarmoqlari” AJ tomonidan elektr kabellari yotqizish uchun ko‘chalar qazilayotganiga guvoh bo‘lyapmiz. Kun.uz’ga kelgan murojaatda Yashnobod tumanidagi 2 oydan beri sekinlashib qolgan xuddi shunday qazish ishlari natijasida hududdagi daraxt ildizlariga ziyon yetkazilayotganidan xavotir bildirilgan.

Ildizlar chopilgan, ishlar to‘xtab qolgan

Yashnobod tumanining Elbek ko‘chasiga yetib borganimizda haqiqatan ham 1 kmga yaqin hudud elektr kabellari yotqizish uchun qazilgani, chuqurlarda maxsus himoya betonlari o‘rnatilgani, ammo ish kuni, ertalabki soat 11 lar atrofi bo‘lishiga qaramasdan, bu yerda hech qanday ish olib borilmayotganiga guvoh bo‘ldik.

Murojaatda aytilganidek, o‘nlab daraxtlarning ildizlariga ziyon ham yetgan. Masala esa bu ziyonning daraxtlar kelajagi uchun qanchalik xavfli ekanligida.

E’tiroz va munosabat

“Bahorda boshlangan ishlar, mana yoz kelibdiki, tugagani yo‘q. Qazib tashlangan joylar shu ahvolda yotibdi. Odamlar chuqurga chiqindi ham tashlashmoqda. Oldin daraxtlar tagiga suv quyib ketishardi. Hozir bu yerlar kovlanganiga tashlandiq bo‘lib qolib, daraxtlarimiz qurib ketyapti”, deydi shu yerga yaqin xonadonlarda yashovchi onaxon.

Bunga javoban Yashnobod tumani Ko‘kalamzorlashtirish va irrigatsiya bo‘limi boshlig‘i Bahodir Umarov shunday dedi:

—  Har bir daraxt nihollargacha e’tiborimizda. Kovlangan hududda suv sepish mashinasi kirib bo‘lmaydigan joylarga ishchilarmiz chelaklab suv tashib, daraxtlarni sug‘orishyapti. Daraxtlarga hech qanday xavf yo‘q. Agar bo‘lganda 2 oy emas, bir haftaga bormasdan daraxtlar qurib qolgan bo‘lardi.

Yashnobod tumani Ekologiya bo‘limi inspektori Izzatilla Qodirov ham hududga yetib kelib, daraxtlarning holati haqida ma’lumot berdi:

“Hozir issiq bo‘lgani uchun daraxtlar tagiga suv qo‘yilgani bilan 1-2 soatda yerdagi nam qochadi. Shunga ko‘pchilik sug‘orilmagan deb o‘ylaydi. Unday emas, bu joylar rahbariyat tomonidan qattiq nazoratga olingan. Asos ildizlarga zarar yetgan bo‘lishi mumkin. Daraxt naviga ham bog‘liq, bu daraxtlar chidamli. Ular qurib qolmaydi. Shu o‘rinda aholidan bu holatni to‘g‘ri tushunishlarini so‘raymiz. Bu ishlar behudaga ketayotgani yo‘q, Toshkent shahar aholisini uzluksiz elektr energiyasi bilan ta’minlash maqsad qilingan”, deydi u.

Shuningdek, ekologiya mas’ulining qo‘shimcha qilishicha, hududga kabellar yotqizish rejasi daraxtlar joylashuviga qarab ishlab chiqilgan. Shu sababli chuqurlardagi himoya betonlari ham to‘g‘ri chiziq emas, “ilon izi” shaklida yotqizilgan.

To‘xtab qolgan ishlarni yakuniga yetkazish muhlatlari

Mutasaddilardan 2 oyda qurimagan daraxtlar kelajakda ham quritib qo‘yilmasligi va’dasini oldik. Bundan xotirjam ham bo‘ldik, deylik. Lekin o‘lda-jo‘lda tashlab ketilgandek ko‘rinayotgan bu ishlar qachon yakuniga yetadi-yu, qazib tashlangan hududlarni yana kim obod qiladi? Shu kabi savollarimizga esa “Hududiy elektr tarmoqlari” aksiyadorlik jamiyati matbuot xizmati rahbari Faxriddin Nuraliyevdan javob oldik.

Nuraliyevning ma’lum qilishicha, poytaxt bo‘ylab elektr kabellarini yotqizish ishlari prezidentning 91-sonli qarori asosida amalga oshirilmoqda. Toshkent shahrining katta qismida kabellar yotqizilib, chuqurlar qayta to‘ldirilgan. Ayni paytda ishlari to‘xtab qolgan Elbek ko‘chasidagi mazkur hududda ham 1 oy ichida ishlar yakunlanishi kutilmoqda.

Kun.uz’da biroz avval yoritilgan yana bir shunday holat – Toshkent shahrining Beshyog‘och ko‘chasidagi qazish ishlari esa joriy iyul oyining oxiriga qadar yakunlanishi ma’lum qilindi.

Qazib tashlangan shaharni qayta obod qilish kimning zimmasida?

Shu bilan birga, qazilib qayta yopilgan hududlar Toshkent shahar hokimligi, Obodonlashtirish va ko‘kalamzorlashtirish bosh boshqarmasi, tuman hokimliklari hamda “Hududiy elektr tarmoqlari” aksiyadorlik jamiyati bilan hamkorlikda obodonlashtirilib, ta’mirlanishi qo‘shimcha qilindi.

Biz uzluksiz elektr ta’minotiga hech qanday istisnolarsiz muhtojmiz. Lekin bu ekologik yo‘qotishlar evaziga bo‘lmasligi lozim. Jarayonlarni diqqat bilan kuzatishda davom etamiz.

Sardorbek Usmoniy