Navalniy 18-marta jazo izolyatoriga yuborildi

Muxolifatchi Aleksey Navalniy «ekstremizm» ishi bo‘yicha hukm e’lon qilinganidan so‘ng darhol 14 kunga jazo kamerasiga (JIZO) jo‘natildi. Bu haqda 7 avgust, dushanba kuni siyosatchining matbuot kotibi Kira Yarmish Twitter’da ma’lum qildi va bu chora unga nisbatan 18-marta qo‘llanganini ta’kidladi.

Hukm e’lon qilinishidan oldin ham Navalniy jazo kamerasida saqlangan, deya eslaydi Yarmish. Uning hisob-kitoblariga ko‘ra, u yerda bo‘lgan umumiy muddat 207 kunni tashkil etgan. Navalniy birinchi marta 2022 yilning 15 avgustida, Vladimir viloyati, Melexovo qishlog‘idagi 6-sonli qattiq tartibli koloniyaga o‘tkazilganidan ko‘p o‘tmay, jazo kamerasiga joylashtirilgan edi. 

4 avgust kuni Moskva shahar sudi Melexovodagi IK-6da bo‘lib o‘tgan sayyor majlisda Korrupsiyaga qarshi kurashish jamg‘armasi («FBK») asoschisini 19 yilga «maxsus rejimdagi» koloniyaga hukm qildi. Bundan tashqari, Navalniy 500 ming rubl miqdorida jarimaga tortildi, ozodlikka chiqqanidan keyin 3 yilga erkinligi cheklanadi, 10 yil davomida internetda murojaat va boshqa materiallarni chop etishi taqiqlandi. 

Siyosatchi Jinoyat kodeksining olti moddasi bo‘yicha yetti epizodda  ayblangan: ekstremistik hamjamiyat yaratish, ekstremizmga ommaviy chaqiriqlar, fuqarolarning huquqlarini buzuvchi notijorat tashkilot tuzish, ekstremistik harakatlarni moliyalashtirish, shuningdek, voyaga yetmaganlarni xavfli harakatlarga jalb etish va natsizmni reabilitatsiya qilish. Ushbu epizodlar bo‘yicha sud jarayonlari 2023 yil may oyida boshlangan.