Keyn «Bavariya»ga o‘tishi hal bo‘ldi

«Tottenhem» hujumchisi Harri Keyn «Bavariya»ga o‘tishga rozilik berdi. Bu ma’lumotni insayder Fabritsio Romano tasdiqladi.

Uning ma’lumotiga ko‘ra, «shporlar» forvard uchun 100 million yevro oladi, yana 20 million yevro miqdorida bonuslar ko‘zda tutilgan.

30 yoshli angliyalik futbolchi myunxenliklar klubi bilan 4 yillik shartnoma imzolaydi. Bugun u Germaniyaga yo‘l olib, tibbiy ko‘rikdan o‘tadi. 

Shu tariqa, 30 yoshli hujumchi ilk bor xorij chempionatida o‘ynab ko‘radi.

Insayder Florian Plettenbergga ko‘ra, Keyn «Bavariya» safida 12 avgust kuni Germaniya Superkubogi uchun «RB Leypsig» klubiga qarshi kechadigan o‘yindayoq maydonga tushishni istamoqda.

Avvalroq jurnalist Mettyu Lou Keyn myunxenliklar rahbariyati uchun dedlayn belgilagani xabar qilingandi.

2022/23 yillar mavsumida ushbu forvard londonliklar safida 49 o‘yin o‘tkazib, 32 gol urgan va 5 golga uzatma bergandi. Uning klub bilan hozirgi shartnomasi keyingi yil yozigacha tuzilgandi.