Vensan Kompani kutilmaganda ehtiyotkor oʻyin uslubi tanladi Luis Diasni zaxirada qoldirib, koʻproq himoyaga yordam beradigan Stanishichni tushirdi. «Bavariya» oldingi chiziqda kuchli pressing bilan oʻynashdan voz kechdi va qarshi hujumlarga tayandi.
Londonliklar oʻyin startidayoq hujumdagi asosiy ijrochilaridan biri Bukayo Sakani yoʻqotdi. Oʻng qanot vingeri yoʻq joyda jarohat oldi – oʻyindan keyin chiqqan xabarlarga koʻra futbolchi dekabrgacha safga qayta olmasligi mumkin.
Arteta Sakaning oʻrniga Eberechi Ezeni maydonga tashladi va aynan u 25-daqiqada «Arsenal»ni hisobda oldinga olib chiqdi. Martin Edegor maydonning ikkinchi qismida turib toʻpni himoyachilar ortiga yetkazib berdi, Eze ofsayd chizigʻida harakat qilib bu pasga yetib bordi va osonlik bilan Manuel Noyerni dogʻda qoldirdi.
10 daqiqa oʻtib «Bavariya» javob qaytardi. Butun oʻyin davomida orqaroqqa tushib oʻynagan Harri Keyn xuddi Edegorniki kabi ideal pas berdi. Himoya chizigʻini kesib oʻtgan toʻpga Alfonso Devis yetib bordi va David Rayyaga hech qanday imkon qoldirmadi.
Ikkinchi boʻlimda mezbonlar hujumkor futbol namoyish etishga oʻtishdi va raqibni jarima maydoniga qamay boshladi. Bu oʻz samarasini berdi: Keynning zarbasidan keyin toʻp yoʻlini bloklashga uringan Yurrien Timberning qoʻli havoda qolib ketgani penaltiga sabab boʻldi. Harri 11 metrdan aniq zarba berdi – 2:1.
Myunxenliklar shundan keyin ham hujumda oʻynashda davom etishdi, ammo ikkinchi boʻlimning ikkinchi yarmida charchab qolishdi. Shundan keyin «Arsenal» oʻyin nazoratini qoʻliga oldi, Artetaning almashtirishlari bu safar ham oʻzini oqladi va hisob tenglashdi. Mehmonlar bir necha daqiqa davomida raqibning koʻzini ochirmadi va bu shturm Rays hisobni tenglashtirishi bilan yakunlandi – 2:1.
Mavzuga oid
Ketma-ket ikki oʻyinda durang qayd etgan «Bavariya» hozircha kuchli sakkizlikdan tashqarida. «Arsenal» esa YECHL umumiy guruh bosqichida 15 oʻyindan iborat gʻalabali seriyasini toʻxtatgan boʻlsa-da, 7 ochko bilan kuchli sakkizlikda qolmoqda.
Keyingi turda «Bavariya» 4-noyabrga oʻtar kechasi «Atletiko»ga qarshi safarda oʻynaydi, «Arsenal» Pragada «Slaviya» klubi mehmoni boʻladi.
La liga oʻyinlaridan diskvalifikatsiya qilingan Vinisius Junior YeChLda tushishda davom etmoqda, undan yaxshiroq formadagi Yan Diomande esa sobiq jamoasiga qarshi oʻyinni zaxira oʻrindigʻida boshladi.
Oʻyinning birinchi boʻlimida Tibo Kurtua asosiy qahramonga aylandi. U Romuluning xavfli zarbasini qaytardi va Nkunku bilan duelda ustun keldi. Boʻlim oxirida esa Bernardu Silva madridliklar safidagi ilk golini urdi: Arda Gulerning murakkab zarbasidan keyin Kurtuaning Belgiya milliy jamoasi safidagi oʻrinbosari Vandervordt rikoshetga qaramay, seyv ijro etgandi, ammo toʻpga birinchi boʻlib portugaliyalik yarimhimoyachi yetib keldi.
Ikkinchi boʻlim boshida esa «Real» hisobni qulay koʻrinishga keltirdi. Vini va Judning chap qanotdagi kombinatsiyasidan soʻng toʻp jarima maydoniga oshirildi, Kilian Mbappe boshda toʻpni darvozabon hududiga tashlab berdi, Guler esa barchadan ildamroq harakat qildi. Arda oʻtgan turda «Roma»ga qarshi oʻyinda 2 assist amalga oshirgandi, bu turda esa 1+1 qayd etdi.
Keyin esa Mourinio baribir Diomandeni maydonga tushirdi va u bu oqshom ham Vinisiusdan yaxshiroq oʻynadi. U avvaliga Mbappega golli uzatma berdi, koʻp oʻtmay oʻz nomiga ham gol yozdirib qoʻydi. «Leypsig» soʻnggi daqiqalarda Tibo Kurtuani quruq oʻyindan mahrum etdi, ammo bu umumiy natijaga taʼsir koʻrsata olmadi – 4:1.
Keyingi turda «Real»ni AEK maydoniga safar kutmoqda, «Leypsig» esa «Manchester Siti»ni qabul qiladi.
«Komo» ilk daqiqalardanoq raqib oʻyin jihatdan juda yomon holatda ekanini payqadi. Niko Pas 3-daqiqda, ilk hujumdayoq hisobni ochdi. «MU» butun boʻlim davomida tarqoq harakat qildi va tanaffusgacha birorta ham zarba bera olmadi.
Sesk Fabregas jamoasi esa hujum ortidan hujum uyushtirdi, ikkinchi boʻlimda oʻyinni yanada kuchaytirdi. 49-daqiqada Pas Anastasios Duvikasga assist berdi. 57-daqiqada argentinalik futbolchi toʻpni Karlos Balebadan olib qoʻydi va ikkinchi golini urdi. Oʻyinning bir soati ortda qolayotganida hisob 3:0 koʻrinishini oldi.
Oʻyin oxirlarida jamoalar bittadan gol urishdi. 76-daqiqada mezbonlar himoyachisi Xakobo Ramon Kayki Brunoning uzatmasidan unumli foydalandi. «MU» safida esa zaxiradan tushgan Joshua Zirkze qoʻshimcha daqiqalarda yagona javob goliga mualliflik qildi.
Brunu Fernandesh oʻyindan keyin Maykl Kerrikning taktikasini tanqid qildi: «Raqibga personal oʻynamaslik qarorini murabbiylar shtabi qabul qilgan – buni men emas, ular hal qiladi. Men faqat dadilroq pressing qilish, koʻproq tavakkalchilik qilish va yuqoriroqqa chiqib oʻynash kerakligini aytdim. «Komo» bizga qarshi aynan shunday oʻynadi».
Endi asosiy masala – Kerrik oʻz kursisini yana qancha vaqt saqlab qolishida boʻlmoqda. Katta ehtimol bilan, Sesk uning isteʼfosini yaqinlashtirdi.
Keyingi turda «MU» oʻz uyida «Roma»ni qabul qiladi, «Komo» «Lans» mehmoni boʻladi.
«Inter» oʻz uyidagi uchrashuvda anchagacha qiynaldi. «Shaxtyor» himoyada mardonavor turdi, vaqti-vaqti bilan qarshi hujumlar ham uyushtirdi.
68-daqiqada esa milanliklar jiddiy muammoga duch keldi: Alessandro Bastoni ikki daqiqa ichida ikkita sariq kartochka oldi: avvaliga hakam bilan bahslashgani uchun ogohlantirildi, keyin esa Oleg Ocheretkoning yuziga uriyu yubordi va maydonni erta tark etdi.
Ammo «Inter» oʻn kishi boʻlib qolganida gʻalaba golini urdi. Zaxiradan tushgan Genrix Mxitaryan toʻpni himoyachilar ortiga tashlab berdi,
Karlos Augusto esa yakkama-yakka vaziyatdan unumli foydalandi. «Shaxtyor» oʻyinning katta qismida yaxshi harakat qildi, ammo birgina xato oʻyin taqdirini hal qildi.
Keyingi turda «Inter» «Feyenoord» maydoniga safar qiladi, «Shaxtyor»ni «Sporting»ga qarshi bahs kutmoqda.
«Villa» navbatdagi oson gʻalabaga erishdi. 23-daqiqada Ross Barkli Ibraima Mbaye burchakdan oshirgan toʻpni darvoza toʻriga yoʻlladi. Angliyalik ushbu yarimhimoyachi 32 yoshda yorqin oʻynamoqda: oʻtgan turda «Fener»ga qarshi oʻyinda dubl va assist qayd etgandi, bu oʻyinda ham maydonni golsiz tark etmadi.
37-daqiqada Emiliano Buendia penaltini aniq ijro etdi, 62-daqiqada Henrik Heggheym Alisonning zarbasidan keyin oʻz jamoasi darvozasini ishgʻol etib qoʻydi. «Viking» oʻyin oxirida birgina gol bilan javob qaytardi.
Keyingi turda «Villa» «Barselona» bilan oʻynaydi, «Viking» «Sabah»ni qabul qiladi.
«Feyenoord» vaziyatlardan foydalanishda oqsadi. Zehiel darvozabon hududidan turib toʻpni aniq tepa olmagan epizod – tur xatosiga aylandi. «Betis» shu kuni raqibga qaraganda koʻproq hujum qildi, 23 bor zarba berdi (raqibda 12 ta) va ikkinchi boʻlimda oʻzi haqli boʻlgan golni urdi. Azzalzuliyning faolligidan keyin toʻp jarima maydoni ichida himoyachiga tegdi va belgilangan penaltini Isko aniq ijro etdi. Bu zarba Manuel Pellegrini jamoasiga YeChLni qatorasiga uch gʻalaba bilan boshlash imkonini berdi.
Keyingi turda «Betis» Dortmundda «Borussiya» mehmoni boʻladi, «Feyenoord» – «Inter» bilan oʻynaydi.
Bu oʻyinda faqat belgiyaliklar gol urishdi. Birinchi boʻlim oxirida Xans Vanaken darvozabon Roben Risserning seyvini yoʻqqa chiqarib, hisobni ochdi. 50-daqiqada esa Vanakenning boshda yoʻllagan zarbasidan keyin ham darvozabon toʻpni qaytargandi, ammo himoyachi Xoakin Seys qaytgan toʻpga takroriy zarba yoʻlladi. 72-daqiqada Karlush Forbsh hisobni yirik koʻrinishga keltirdi.
«Lans» yirik hisobda magʻlub boʻlishga loyiq emasdi: fransuzlar koʻproq zarba berishdi (19:11), koʻproq yaqqol vaziyatlar yaratishdi (6:4) – ammo belgiyaliklar vaziyatlardan yaxshiroq foydalanishdi.
Keyingi turda «Bryugge» PSV mehmoni boʻladi, «Lans» uyda «Komo»ni qabul qiladi.
«Sporting» oʻz uyidagi oʻyinni kuchli boshlagandi. Irankunda Lyubichichni jarima maydoni ichida fol ishlatishga majbur qildi, Suares esa penaltini aniq ijro etdi. Lekin penatiga sababchi boʻlgan futbolchi tezda aybini yuvdi. U toʻpni olib qoʻyishi bilan boshlangan hujumda Lang hisobni tenglashtirdi.
Lyubichich ikkinchi golli hujumda ham muhim ishni bajardi. U toʻpni raqibdan olib qoʻyib, uni jarima maydonigacha olib bordi va Kalayjichni qulay vaziyatga chiqardi. Besh daqiqa oʻtib Danek mehmonlarning uchinchi golini urdi. Bu zarba LASK jamoasiga asosiy yevrokubokdagi ilk gʻalabani taqdim etdi, Suaresning oʻyin oxiridagi ikkinchi goli natijaga taʼsir koʻrsatmadi.
Keyingi turda «Sporting» «Shaxtyor» bilan oʻynaydi, LASK «Slovan»ni qabul qiladi.
Jamoalar ilk daqiqalardanoq hujumga oʻtishdi. «Galatasaroy» 2-daqiqada Yunus Oqgunning goli bilan hisobni ochdi. Ammo «Lill» tezda oʻziga keldi va oʻyinda burilish yasadi: 19 yoshli Soriba Diaune dublni rasmiylashtirdi.
Boʻlim oxirida «Galatasaroy» muvozanatni tikladi: Roland Shallaining uzatmasidan keyin Batrakov boshda aniq zarba yoʻlladi. Yozgi transferlarda turklar jamoasi safiga kelib qoʻshilgan rossiyalik futbolchi uchun bu YeChLdagi ikkinchi gol boʻldi – oʻtgan haftada u «Barselona» darvozasini ham ishgʻol etgandi.
Tanaffusdan keyin «Galatasaroy» yorqinroq oʻyin koʻrsatdi va gʻalabani oʻziniki qildi. 52-daqiqada «Lill»ning turkiyalik darvozaboni Berke Oʻzerdan qaytgan toʻpni Bintolib beixtiyor oʻz jamoasi darvozasiga kiritib yubordi. 61-daqiqada esa Viktor Osimhen sobiq jamoasi darvozasini ishgʻol etdi va oʻyinga nuqta qoʻydi.
Keyingi turda «Galatasaroy» «Shtutgart»ni qabul qiladi, «Lill»ni «Budyo-Glimt» maydoniga safar kutadi.
