«Kommersant»: Google Rossiyada bir qator servislarini bloklashni boshladi

Amerikaning Google LLC konserni 10 avgustga o‘tar kechasi Google Workspace (pochta, «Google Hujjatlar», «Google Disk») korporativ xizmatlarini Rossiyaning bir qator kompaniyalari uchun blokladi. Bu haqda 11 avgust, juma kuni «Kommersant» gazetasi ikki yirik IT-kompaniyadagi manbalariga tayanib xabar berdi. Uning versiyasiga ko‘ra, gap sanksiyalar ro‘yxatiga kiritilgan shaxslar haqida ketmoqda. Nashr manbalaridan birining ishontirishicha, Amerika kompaniyasi blokni «spam-xabarlar» bilan izohlagan. 

Asosan kichik va o‘rta biznes kompaniyalari

Ayni paytda, korporativ mijozlar Google xizmatlari bilan bog‘liq masalalar bo‘yicha tez-tez murojaat qiladigan Softline’da bloklashlar soni ko‘paymagani ma’lum qilindi. 

Mutaxassislarning fikricha, Google korporativ xizmatlaridan asosan, buni kiberxavfsizlik tamoyillariga zid deb hisoblagan Rossiyaning yirik bizneslaridan farqli ravishda, kichik va o‘rta biznesi foydalanadi.

«So‘nggi paytlarda hech qanday o‘zgarish bo‘lmagan»

Shu fonda Google’dagi TASS manbasi korporatsiya yaqinda Rossiyada Google Workspace xizmatlaridan foydalanishga o‘zgartirishlar kiritilmaganini, ammo foydalanish shartlari buzilgan taqdirda bu yuz berishi mumkinligini aytdi. «Vaziyatni tushunish qiyin, chunki Google qaysi ikki kompaniya zarar ko‘rganini bilmayapti», — dedi manba. «Biz Rossiyada mavjud Google Workspace xizmatlariga kirishda so‘nggi o‘zgarishlar bo‘lmaganini tasdiqlashimiz mumkin», — deya qo‘shimcha qildi u.

Iyun oyida Moskvaning Presnenskiy tuman sudi Google brendiga egalik qiluvchi Alphabet Inc. Rossiyada 4 milliard rubl (47 million dollar) jarima to‘lashi kerakligi haqida qaror chiqardi. Qaror Google LLC Rossiya Federal monopoliyaga qarshi xizmati qarori bo‘yicha oldingi jarimani o‘z vaqtida to‘lamagani munosabati bilan qabul qilingan.