«Tolibon» Afg‘onistondagi barcha siyosiy partiyalarni taqiqladi

«Tolibon» harakati Afg‘onistondagi barcha siyosiy partiyalarning faoliyati shariatga zid ekanini aytib, ularni taqiqladi. «Tolibon» hukumatidagi adliya vaziri Abdul Hakim Sharai 17 avgust, payshanba kuni Kobuldagi matbuot anjumanida ushbu taqiq haqida ma’lum qildi.

«Mamlakatda siyosiy partiyalar faoliyatida shariat asoslari yo‘q. Ular milliy manfaatlarga xizmat qilmaydi, xalq esa ularni qadrlamaydi», - deya ta’kidladi Abdul Hakim Sharai.

70 dan ortiq yirik va kichik siyosiy partiyalar Afg‘oniston Adliya vazirligida ikki yil avval, «Tolibon» mamlakat ustidan nazoratni qayta qo‘lga kiritgunga qadar ro‘yxatga olingan edi.

Ayni paytda BMTning Afg‘onistonga yordam ko‘rsatish missiyasi (UNAMA) o‘tgan o‘n kun ichida mamlakatning olti viloyatida «Tolibon» tomonidan jurnalistlar qo‘lga olinganini eslatdi. Missiya rasmiylarning so‘z erkinligi huquqini hurmat qilish majburiyati haqida eslatdi.

Afg‘oniston «Chegara bilmas muxbirlar» tashkilotining matbuot erkinligi reytingida 180 pog‘onadan 152-o‘rinni egallaydi.

Ikki yil avval, 2021 yil 15 avgustda Afg‘onistonda «Tolibon» harakati hokimiyat tepasiga kelgan edi. Tolibon NATO boshchiligidagi Xalqaro xavfsizlik kuchlari (ISAF) olib chiqib ketilganidan keyin bir necha hafta ichida butun mamlakatni nazorat ostiga oldi.

«Afg‘oniston jamiyati ruhiy tushkunlikka tushib, charchagan. Iqtisodiyot vayronaga aylangan. 20 milliondan ortiq odam qashshoqlik chegarasida yashab, hayot uchun kurashmoqda», - deydi jurnalist, Ariana teleradiokompaniyasi sobiq rahbari Xushal Asefi.