Fort-Harrisondagi mashg‘ulotlarning 230 dan ortiq ishtirokchisi harbiy qaror qabul qilish va xalqaro xavfsizlik tahdidiga birgalikda javob berish ko‘nikmalarini shakllantirmoqda.
AQShning Montana shtatida Qozog‘iston, Qirg‘iziston, Mo‘g‘uliston, Pokiston, Tojikiston, Turkmaniston, O‘zbekiston va AQSh harbiy xizmatchilari ishtirokida «Mintaqaviy hamkorlik 23» (RC23) mashg‘ulotlari o‘tkazilmoqda.
Qayd etilishicha, AQSh tarafidan mashg‘ulotlarga mamlakatning barcha hududlaridan xodimlar, jumladan Arizona, Massachusets, Missisipi, Montana va Virjiniya milliy gvardiyasi harbiylari va uchuvchilari jalb etilgan.
«Mashqlar ishtirokchi davlatlar o‘rtasidagi munosabatlarni mustahkamlash, hamkorlikda ishlash uchun salohiyat va imkoniyatlarni oshirishga qaratilgan», deyiladi xabarda.
Qayd qilinishicha, Fort-Harrisondagi mashg‘ulotlarning 230 dan ortiq ishtirokchisi birinchi bosqichda harbiy qaror qabul qilish yoki MDMP bilimlar bazasini yaratdi. So‘ngra tadbir rasman boshlanganidan so‘ng, AQSh va hamkor mamlakatlarning xodimlari xalqaro xavfsizlik tahdidiga birgalikda javob berish ko‘nikmalarini shakllantirdi.
«RC23 ishtirokchilari mintaqaviy xavfsizlik va barqarorlikni mustahkamlash, milliy salohiyatni oshirish, ommaviy qirg‘in qurollari, terroristik unsurlar va giyohvand moddalarni to‘xtatish usullari va tartiblarini takomillashtirish hamda o‘zaro hamkorlik va ma’lumot almashishni oshirishga qaratilgan ssenariylarga duch kelishadi», deyiladi xabarda.
