Ukrainaning davlat qarzi 121 milliard yevrodan oshdi

Iyul oyi davomida Ukrainaning davlat qarzi 146,23 milliard grivnaga (3,66 milliard yevro) oshdi. Bu haqda Ukraina OAV 28 avgust, dushanba kuni e’tibor qaratgan Moliya vazirligi ma’lumotlarida aytiladi. 31 iyul holatiga ko‘ra, mamlakatning davlat qarzi 4860,59 mlrd grivnani (121,6 mlrd yevro) tashkil qildi, deya xabar berdi idora.

Moliya vazirligi ma’lumotlariga ko‘ra, tashqi qarz ushbu summaning 68,29 foizini yoki 3 319,19 mlrd grivnani (83 mlrd yevro) tashkil etgan. Qolgan 31,71 foizi 1 541,41 milliard grivna (38,5 milliard yevro) ichki qarzdir.

Yevropa Ittifoqidan yana bir kredit

Bir necha kun oldin Ukraina yana bir yordam paketi sifatida Yevropa Ittifoqidan 1,5 milliard yevro miqdorida kredit olgan edi. Mablag‘lar Rossiya harbiy harakatlaridan himoyalanayotgan mamlakatga davlat organlari ishini qo‘llab-quvvatlash va buzilgan infratuzilmani ta’mirlashda yordam berishi kerak, dedi Yevropa komissiyasi prezidenti Ursula fon der Lyayyen.

Berilgan mablag‘lar 2022 yil oxirida tasdiqlangan va Kiyevga jami 18 milliard yevrogacha mablag‘ o‘tkazishni nazarda tutuvchi kredit dasturiga kiritilgan. Ushbu dastur Ukraina tomonining 20 band, jumladan, korrupsiyaga qarshi kurash va qonun ustuvorligini ta’minlash bo‘yicha majburiyatlarini bajarishi bilan bog‘liq. Pulni qaytarish 2033 yildan so‘ng amalga oshirilishi ko‘zda tutilgan va 35 yilga mo‘ljallangan.