Google'dan Starbucks'gacha - dunyo gigantlarini boshqarayotgan hindlar

Hindistonlik mutaxassislarning ayniqsa IT sohasida erishayotgan yutuqlari jahonni lol qoldiryapti. Yaqinda Global Index nashri e’lon qilgan ro‘yxatda dunyodagi ko‘plab top korporatsiyalarning boshqaruvchi direktorlari hindlar ekanini ko‘rish mumkin. Bular qatoriga Alphabet Google, Microsoft, YouTube, Adobe, World Bank Group, IBM va Starbucks kabi mashhur kompaniyalar kiradi.

Ayni paytda bu kadrlarning ko‘pchiligi xorijda oliy ta’lim olganini ta’kidlash kerak. Quyida dunyo miqyosidagi gigant kompaniyalarni boshqarayotgan hindistonlik top menejyerlarni sanab o‘tamiz.

51 yoshli, asli hindistonlik Sundar Pichay 2015 yildan buyon Google kompaniyasining boshqaruvchi direktori hisoblanadi.

Maduray shahrida tug‘ilgan Pichay avvaliga o‘z yurtida olim ta’lim olgan; AQShga kelgach, Stenfordda va Pensilvaniya universitetlarini tamomlagan.

Haydarobodda tavallud topgan 56 yoshli Satya Nadella Microsoft kompaniyasining boshqaruvchi direktori hisoblanadi.

Manipal texnologiyalar instituti, Viskonsin va Chikago universitetlarida ta’lim olgan. 2014 yildan buyon eng mashhur IT kompaniyasida boshqaruvchi.

50 yoshli yana bir hind Nayel Mohan – YouTube kompaniyasining boshqaruvchi direktori.

Mohan asli AQShda tug‘ilgan, keyinroq ota yurtida bir qancha vaqt yashab Amerikaga qaytadi va bir necha bosqichda Stenfordda ta’lim olgan. Mohan 2023 yil fevral oyidan eng mashhur videoportalning boshqaruvchi direktori.

60 yoshli Shantanu Narayen ham Haydarobodda tug‘ilgan. U dunyo miqyosida ommabop dasturlarni ishlab chiqaruvchi Adobe kompaniyasining boshqaruvchi direktori hisoblanadi.

Narayen Hindistondan keyingi ta’limni asosan AQSh universitetlarida olgan – Ohayo, Kaliforniya universitetlarida o‘qigan. 2007 yildan buyon ushbu lavozimda.

61 yoshli yana bir qahramonimiz ham hind — Arvind Krishna. U dunyoga mashhur IBM kompaniyasining boshqaruvchi direktori.

Hindistonda tug‘ilgan, AQShning Illinoys unversitetida ta’lim olgan. 2020 yildan buyon IBM’da boshqaruvchi direktor.

Asli kelib chiqishi hindistonlik bo‘lgan Ajay Banga – shu yil iyun oyida 5 yil muddatga Jahon banklari guruhining (World bank Group) 14-prezidenti etib tayinlandi.

Banga bunga qadar Mastercard'da boshqaruvchi direktor bo‘lgan.

56 yoshli yana bir qahramonimiz Laxman Narasimhan dunyoga mashhur qahvaxonalar tarmog‘i Starbucks'ning boshqaruvchi direktori hisoblanadi.

U ham bu lavozimga kelganiga ko‘p bo‘lmadi – 2023 yil mart oyida.

Bu yuqorida nomlari keltirilgan kompaniyalarning eng mashhurlari xolos. Xalqaro mehnat tashkiloti ma’lumotlariga ko‘ra, dunyodagi 35 foizga yaqin frilanser-aytichilarni aynan Hindiston yetkazib bermoqda.

Keyingi maqolalarimizda Hindistondagi IT va ta’limga e’tibor, kadrlarni yetishtirish masalalarini yoritamiz.

Farrux Absattarov tayyorladi.

#Hindiston #IT