«Toshkent-Markaziy» temiryo‘l vokzalidan aksariyat poyezdlar harakati to‘xtatiladi

15 sentabrdan 15 oktyabrgacha «Toshkent-Markaziy» (Shimoliy) temiryo‘l vokzalidan harakatlanib kelayotgan aksariyat poyezdlar qatnovi «Toshkent-Janubiy» temiryo‘l vokzalidan amalga oshiriladi. Bunga «To‘qimachi» hamda «Toshkent-yo‘lovchi» temiryo‘l bekatlari oralig‘idagi temiryo‘lda texnik ta’mirlash ishlari olib borilishi sabab sifatida ko‘rsatilgan. Bu haqda «O‘zbekiston temiryo‘llari» AJ xabar berdi.

Jumladan, bir oy mobaynida yuqori tezlikda harakatlanuvchi «Afrosiyob» elektropoyezdi, «Sharq» (Toshkent–Buxoro– oshkent), «Nasaf» (Toshkent–Qarshi–Toshkent), «O‘zbekiston» (Toshkent–Andijon–Toshkent), hamda xalqaro yo‘nalishlardagi «Toshkent–Volgograd–Toshkent», «Dushanbe–Toshkent–Dushanbe» yo‘lovchi poyezdi «Toshkent-Janubiy» temiryo‘l vokzali hududidan reyslarini amalga oshiradi.

Shu bilan birga, «Olmaota–Toshkent–Olmaota», «Toshkent–Novosibirsk–Toshkent», «Toshkent–Samara–Toshkent» yo‘nalishida harakatlanadigan yo‘lovchi poyezdlar hamda «Toshkent–Xojikent–Toshkent» shaharlararo poyezdlaridan tashqari, «Toshkent-Markaziy» temiryo‘l vokzalidan qatnovini amalga oshirib kelayotgan barcha yo‘lovchi poyezdlar 15 sentabrdan 15 oktyabrgacha «Toshkent-Janubiy» temiryo‘l vokzaldan o‘z harakatini boshlaydi.

Shuningdek, «Toshkent-Markaziy» temiryo‘l vokzalidagi chiptaxonalardan poyezd jo‘nashidan oldin chipta xarid qilgan yoki yanglishib «Toshkent-Markaziy» vokzaliga kelib qolgan yo‘lovchilarni «Toshkent-Janubiy» temiryo‘l vokzaliga olib borish uchun vaqtincha bepul avtobuslar qatnovi yo‘lga qo‘yiladi.