Moravetskiy: Polsha endi Ukrainaga hech qanday qurol bermayapti

Polsha endi Ukrainani hech qanday qurol-yarog‘ bilan ta’minlamayapti. Bu haqda Polsha hukumati rahbari Mateush Moravetskiy Polsat telekanaliga bergan intervyusida ma’lum qildi.

Polsha Kiyevga harbiy yordam berishda davom etadimi, degan savolga javob berar ekan, u: «Polsha endi Ukrainaga hech qanday qurol bermayapti», dedi. 

«Bizning o‘zimiz eng zamonaviy qurollar bilan qurollanyapmiz», dedi Moravetskiy. 

Uning so‘zlariga ko‘ra, Polsha «tinchlikni xohlasang, urushga tayyorlan» tamoyili asosida ishlayapti. 

«Biz ushbu qoidaga amal qilamiz va shuning uchun [qurollarga] katta buyurtmalar berdik», deya qo‘shimcha qildi Moravetskiy. 

Avvalroq Polsha Ukraina Qurolli kuchlariga taxminan 3 milliard dollarlik MiG-29 samolyotlari, T-72 tanklari va 14 ta Leopard 2 tanklari, artilleriya snaryadlari va boshqa o‘q-dorilar, ko‘chma zenit-raketa tizimlari, uchuvchisiz uchish apparatlarini topshirgani haqida xabar berilgan edi.