19-20 sentabr kunlari Qorabog‘da o‘tkazilgan «mahalliy xarakterdagi aksilterror tadbirlari» davomida Ozarboyjon qurolli kuchlarining 192 nafar harbiy xizmatchisi halok bo‘ldi.
Ozarboyjon Sog‘liqni saqlash vazirligi xabar berishicha, qurbonlardan 180 nafari mudofaa vazirligi, 12 nafari esa ichki ishlar vazirligi harbiy xizmatchilaridir. Shuningdek, tinch aholi vakillaridan bir kishi halok bo‘lgani aytilgan.
11 kishining shaxsi sud-tibbiyot ekspertizasi tomonidan sud-genetik ekspertizadan so‘ng aniqlanadi.
Harbiy harakatlar vaqtida yana 511 nafar harbiy va bir oddiy fuqaro jarohatlangan.
- 19 sentabr kuni Ozarboyjon Qorabog‘da «konstitutsion rejimni tiklash» maqsadida «mahalliy xarakterdagi aksilterror tadbirlar» boshlanganini e’lon qilgan va tan olinmagan respublika hududini o‘qqa tuta boshlagandi. 20 sentabr kun o‘t ochishni to‘xtatish bo‘yicha kelishuvga erishildi — uning shartlaridan biri Qorabog‘ armiyasini qurolsizlantirish va arman harbiylarini tan olinmagan respublika hududidan olib ketish edi.
- RF mudofaa vazirligi 20 sentabr kuni Qorabog‘da rossiyalik tinchlikparvar kuchlar halok bo‘lgani haqida xabar berdi. Qurbonlar orasida tinchlikparvar kuchlar kontingenti qo‘mondoni o‘rinbosari Ivan Kovgan ham bor edi. Ozarboyjon prezidenti Ilhom Aliyev Vladimir Putin bilan telefon orqali muloqot chog‘ida bu holat uchun uzr so‘ragan.
