O‘zbekiston hududlari va Yaponiyaning Fukuoka prefekturasi o‘rtasidagi amaliy hamkorlik yanada kengayadi.
O‘zbekistonning Yaponiyadagi elchixonasi delegatsiyasi 26-27 sentabr kunlari amaliy tashrif bilan Fukuoka prefekturasida bo‘ldi, deb xabar bermoqda «Dunyo».
Tashrif davomida, Fukuoka prefekturasi gubernatori Seytaro Xattori, Fukuoka tashqi savdo assotsiatsiyasi, Nishitetsu travel Co. Ltd, Aglis Co.Ltd, Fukuoka Global Support Co.Ltd singari yetakchi kompaniyalar rahbariyati bilan uchrashuvlar tashkil qilindi.
Muloqot natijasida Fukuoka kompaniyalari vakillarining O‘zbekistonga biznes missiyasini uyushtirish va hamkorlikning salohiyatli yo‘nalishlarini ishlab chiqish to‘g‘risida kelishuvga erishildi.
O‘zbekiston diplomatlarining Nishitetsu Travel Co. Ltd kompaniyasi bosh ijrochi direktori Koji Nakamura bilan muzokaralarida mamlakatga Yaponiyadan sayyohlar oqimini oshirish, yangi turizm yo‘nalishlarini ishlab chiqish hamda Kyusyu hududidan O‘zbekistonga charter havo qatnovlarini yo‘lga qo‘yish masalalari muhokama qilindi.
Fukuoka prefekturasining tibbiy va qishloq xo‘jaligi mahsulotlarini ishlab chiqarishga ixtisoslashgan Aglis kompaniyasi prezidenti Xiroyuki Nakamura bilan o‘tkazilgan uchrashuvda ham o‘zaro ikki tomonlama hamkorlikni yo‘lga qo‘yish masalalari muhokama qilindi.
