O‘zbekiston | 13:37 / 25.10.2023
37205
2 daqiqa o‘qiladi

Qishloq xo‘jaligi vazirligiga yangi rahbar tayinlandi

Bu Ibrohim Abdurahmonovning uchinchi vazirlik lavozimidir. U muqaddam innovatsiya vaziri bo‘lgan, so‘nggi yil davomida oliy ta’limga rahbarlik qilib kelayotgandi.

Foto: Kun.uz

Ibrohim Yo‘lchiyevich Abdurahmonov qishloq xo‘jaligi vazirligining yangi rahbariga aylandi. Bu haqda prezident matbuot xizmati xabar bermoqda.

«Qarshi shahrida prezident Shavkat Mirziyoyev raisligida Qashqadaryo viloyatini ijtimoiy-iqtisodiy rivojlantirish masalalari yuzasidan o‘tayotgan yig‘ilishda oliy ta’lim, fan va innovatsiyalar vaziri Ibrohim Abdurahmonov qishloq xo‘jaligi vaziri etib tayinlanishi haqida e’lon qilindi», deyiladi xabarda.

Ibrohim Abdurahmonov 1975 yilda Namangan viloyati Chust tumanida tug‘ilgan. 1992-1997 yillarda Toshkent davlat universiteti (hozirgi O‘zMU)da tahsil olgan. 2001 yil AQShdagi Texas qishloq xo‘jaligi va mexanika universitetini tamomlagan.

Faoliyatini 1997 yildan Genetika va o‘simliklar eksperimental biologiyasi institutida boshlagan, 2002-2012 yillarda Fanlar akademiyasi Genetika va o‘simliklar eksperimental biologiyasi instituti ilmiy xodimi, katta ilmiy xodimi, loyiha rahbari, Genom texnologiyalar markazi laboratoriyasi loyiha rahbari lavozimlarida ishlagan. 2012–2017 yillarda Fanlar akademiyasi Genomika va bioinformatika markazi direktori bo‘lgan, 2017 yilda Fanlar akademiyasi Kimyo-biologiya fanlar yo‘nalishi bo‘yicha vitse-prezident v.b sifatida faoliyat yuritgan.

2017 yil noyabrida yangi tashkil etilgan Innovatsion rivojlantirish vazirligi rahbari etib tayinlangandi.

2022 yil dekabrida prezident farmoni bilan Oliy va o‘rta maxsus ta’lim vazirligi va Innovatsion rivojlantirish vazirligi qo‘shib yuborildi va Abdurahmonov 2023 yil yanvaridan buyon yangi vazirlikka rahbarlik qilib kelayotgandi.

  • Bundan oldinroq 2022 yil avgustidan buyon qishloq xo‘jaligi vazirligiga rahbarlik qilib kelgan Aziz Voitov lavozimidan ozod etilgani xabar qilingandi.

Mavzuga oid