Amerikalik aktyor, «Do‘stlar» teleserialidagi Chendler Bing roli bilan mashhurlikka erishgan Mettyu Perri 54 yoshida vafot etdi.
Amerika nashrlari huquq-tartibot organlaridagi manbalarga tayanib bergan xabarga ko‘ra, aktyor Los-Anjyelesdagi uyidan jonsiz holda topilgan.
Perrining o‘limi haqida birinchi bo‘lib xabar bergan LA Times va TMZ nashrlariga ko‘ra, aktyor uyidagi jakuzida hushidan ketgan, xonada zo‘ravonlik izlari bo‘lmagan.
Nyu-Yorkda yashovchi olti yosh odam taqdiri haqida hikoya qiluvchi «Do‘stlar» seriali 1994 yildan 2004 yilga qadar efirga uzatilgan.
Serialning so‘nggi epizodini AQShda 52,5 mln kishi tomosha qilgan, bu esa uni o‘sha vaqtdagi eng ko‘p ko‘rilgan teleserialga aylantirgan.
«Mettyu nihoyatda qobiliyatli aktyor va Warner Bros. Television Group oilasining ajralmas qismi edi, – deyiladi serialni tasvirga olgan telekompaniya ta’ziyasida. – Uning komediya iste’dodini butun dunyodagilar his qilgan, uning merosi ko‘plab kishilar qalbida yashaydi. Bu juda og‘ir kun».
Perri 1969 yilda Massachusets shtatida tug‘ilgan, ammo uning bolaligi Kanadaning Ottava shahrida o‘tgan, u shu yerda keyinroq Kanada bosh vaziriga aylangan Jastin Tryudo bilan bitta maktabda o‘qigan.
O‘smirlik chog‘ida Perri Los-Anjyelesga keladi. U «Bola bola bo‘lib qoladi» filmida Chezza Rassel rolini o‘ynaydi, shuningdek seriallarda suratga tushadi.
Ammo unga xalqaro miqyosdagi shuhratni «Do‘stlar» komediya seriali keltiradi, u bu serialda Jyennifer Eniston, Kortni Koks, Devid Shvimmer, Mett Leblan va Liza Kudrou kabi yulduzlar bilan birga o‘ynagan. «Do‘stlar» barcha zamonlarning eng muvaffaqiyatli seriallaridan biri bo‘lib qoladi.
2022 yilda Perri «Do‘stlar, sevimlilar va katta qo‘rqinchli narsa» nomli avtobiografiyasini e’lon qilgandi. Kitobda aktyor o‘z aktyorlik faoliyati, romantik munosabatlari, Jyennifer Ennistonni sevib qolgani va rad etilgani, shuningdek, ko‘p yillar davomida alkogol va giyohvand moddalarga qaramlikka qarshi kurashgani haqida aytib bergan.
