Qoraqalpog‘istonda tadbirkorlarga sovitkichli sig‘imlarga xarajatining bir qismi qoplab beriladi

Vazirlar Mahkamasi qarori bilan Qoraqalpog‘iston Respublikasi sovitkichli sig‘imlar uyushmasiga a’zo sub’yektlarga kooperatsiya tashkil etgan holda, sovitkichli sig‘imlarni qurish va jihozlash xarajatlarining, shuningdek  qish va bahor oylarida elektr energiyasi iste’moli xarajatlarining bir qismini qoplash tartibi to‘g‘risidagi nizom tasdiqlandi.

Tartib asosiy turdagi qishloq xo‘jaligi va oziq-ovqat mahsulotlarini saqlashga mo‘ljallangan sovitkichli sig‘imlarga ega  hamda kooperatsiya asosida ish tashkil etgan Qoraqalpog‘iston Respublikasi sovitkichli sig‘imlar uyushmasiga a’zo sub’yektlarga tatbiq etiladi. Bunda sovitkichli sig‘imlarni foydalanishga kiritish va ularni to‘liq jihozlash subsidiya olish sharti hisoblanadi.

Sovitkichli sig‘imlarni qurish va jihozlash xarajatlarining bir qismini qoplash uchun subsidiya ajratish bo‘yicha Agro-subsidiya axborot tizimi orqali ariza beriladi.

Ishchi guruh ariza va unga ilova qilingan hujjatlarni, shuningdek, obekt ishga tushirilganligi va/yoki jihozlanganligini o‘n kun muddat ichida joyiga chiqqan holda o‘rganadi.

Subsidiyalar ishchi guruhning subsidiya ajratish maqsadga muvofiqligi to‘g‘risidagi xulosasiga binoan Qishloq xo‘jaligi vazirligi huzuridagi Qishloq xo‘jaligida xizmatlar ko‘rsatish agentligi va sovitkichli sig‘imni ishga tushirgan sub’yekt o‘rtasida imzolangan shartnomaga asosan ajratiladi.

Agentlik tomonidan tuman (shahar) elektr tarmoqlari tashkiloti tomonidan tasdiqlangan dalolatnoma va hisob-fakturalarda ko‘rsatilgan elektr energiyasi iste’moli xarajatlarining 50 foizi, lekin har bir hisobot oyi uchun 15 ming kVt soat elektr energiyasi qiymatidan oshmagan miqdori qoplab beriladi.