Vazirlar Mahkamasi qarori bilan O‘zbekistonda dasturiy budjetlashtirish tizimini realizatsiya qilishda budjet taqsimlovchilarning budjet dasturlarini ishlab chiqish, nazorat qilish va samaradorligini baholash tartibi to‘g‘risida nizom tasdiqlandi.
Hujjat quyidagilarni nazarda tutadi:
- budjetlashtirish dasturiy tizimini joriy qilishda budjet dasturlarini ishlab chiqish tartibi va muddatlari;
- budjet dasturining maqsadli ko‘rsatkichlari va ularga qo‘yiladigan talablar;
- budjet dasturlarini moliyalashtirish manbalari;
- budjet dasturlarining bajarilishini ta’minlash va nazorat qilish, shuningdek ularning ijrosi bo‘yicha hisobotlarni tayyorlash;
- budjet dasturlarining samaradorligini baholash va ularning realizatsiyasi to‘g‘risidagi ma’lumotlarning shaffofligini ta’minlash.
Budjet dasturlarini ishlab chiqish va amalga oshirishning ustuvor yo‘nalishlari:
- davlat budjetidan har yilgi ajratmalar doirasida aniq maqsadlar va natijalar asosida sifat va miqdoriy ko‘rsatkichlarni (indikatorlarni) shakllantirish;
- budjet loyihasini tayyorlash va qabul qilishda budjet taqsimlovchilarning moliyaviy mustaqilligini oshirish;
- budjet dasturlarini amalga oshirish uchun mas’ul bo‘lgan budjet taqsimlovchilarning jamoatchilik oldida hisobdorligi;
- ijtimoiy-iqtisodiy sohalarda belgilangan strategik maqsad va vazifalardan kelib chiqib amalga oshirilayotgan chora-tadbirlar samaradorligini tahlil qilish va baholash.
Iqtisodiyot va moliya vazirligiga 2024 yil 1 sentabrgacha UzASBO dasturiy kompleksida budjet dasturlarini shakllantirish, tasdiqlash, ro‘yxatga olish va amalga oshirish bo‘yicha hisobotlarni elektron shaklda taqdim etish topshirilgan.