Masharipov: «Hozirgi jamoaning ustunligi - yetakchilarga qarab qolmagan. 2019 yilgi tarkibdan nom bo‘yicha emas, jamoa sifatida yaxshiroqmiz»

«2-bor Osiyo Kubogida qatnashaman. Bundan mamnunman. Musobaqaga tayyormiz. Bizni qo‘llab-quvvatlagani muxlislar yetib kelgani ham xursand qiladi. 

2019 yilgi tarkib bilan taqqoslasak, unda Odil Ahmedov, Ignatiy Nesterov va Anzur Ismoilov kabi katta nomlar ko‘p edi. Hozir o‘sha tarkibdan men va Otabek Shukurov bormiz xolos. Lekin hozirgi jamoada uslub, tartib-intizom va ishonch bor. Jamoa sifatida avvalgidan yaxshiroqmiz. 

Jamoa yaxshi shakllandi. Buni JCh saralashidagi Eron bilan o‘yin (2:2) ham isbotladi. Shuning uchun bizni va muxlislarimizni yorqin turnir kutmoqda, deb o‘ylayman. Kamida kuchli to‘rtlikka kirishimiz kerak. Avvalgiga qaraganda muxlislar ham bizga ko‘proq ishonishmoqda.

Shomurodov va Aliqulov yo‘qligi? Hozirgi jamoaning ustunligi — 1-2 futbolchiga qarab qolmagan. Ba’zida bizdan ko‘ra zaxiradan tushgan futbolchilar samarali  harakat qilishmoqda. Avvallari 1-2 yetakchimiz bo‘lardi va ularning o‘yini qovushmasa, yutqazib qo‘yardik. Menimcha, hozir jamoa sifatida ishonchliroqmiz. 

Bu safar tarkibda Osiyo Kubogida debyut qiladiganlar ko‘pdir, ammo ularning aksariyati klubida va yoshlar jamoalarida katta o‘yinlarda qatnashishga ulgurdi. Hayajonlangan yoshlarga, albatta, biz yordam beramiz», — deydi yarimhimoyachi matbuot anjumanida. 

O‘zbekiston — Suriya bahsi 13 yanvar kuni Toshkent vaqti bilan 22:30da boshlanadi.