Aholining hayoti va sog‘lig‘iga xavf yuzaga kelganda tadbirkorning faoliyati cheklanadi yoki to‘xtatib turiladi

Senatning qirq to‘qqizinchi yalpi majlisida “O‘zbekiston Respublikasining ayrim qonun hujjatlariga o‘zgartirishlar kiritish to‘g‘risida”gi qonun ko‘rib chiqildi.

Ta’kidlanishicha, keyingi yillarda mamlakatda atrof tabiiy muhitni muhofaza qilish, ekologik xavfsizlikni ta’minlash, tabiiy resurslardan oqilona foydalanish hamda sanitariya holatini va ekologik vaziyatni yaxshilash, shuningdek, tadbirkorlik sub’yektlari uchun shart-sharoitlar yaratish bo‘yicha tizimli ishlar olib borilmoqda. Biroq qurilish, ishlab chiqarish va urbanizatsiya ko‘lamlarining kengayishi atrof tabiiy muhitga ifloslantiruvchi moddalar chiqarilishining ortishiga sabab bo‘lyapti.

Favqulodda vaziyatlar, epidemiyalar hamda fuqarolarning hayoti va sog‘lig‘iga boshqa real xavf yuzaga kelishining oldini olish uchun qonunlarda atrof tabiiy muhitga zararli ta’sir ko‘rsatuvchi obektlarning faoliyatini maxsus vakolatli davlat organlarining qaroriga ko‘ra cheklash yoki to‘xtatib turish mumkinligi nazarda tutilgan. Shu bilan birga qonunchilikda tadbirkorlik sub’yektlarining faoliyatini cheklash yoki to‘xtatib turish uchun asos bo‘lgan noaniq ta’riflarning mavjudligi davlat organlarining diskretsion vakolatlari kengligi bilan bog‘liq korrupsiya holatlari paydo bo‘lishiga olib kelishi mumkin.

Qonun bilan “Tabiatni muhofaza qilish to‘g‘risida”gi, “Atmosfera havosini muhofaza qilish to‘g‘risida”gi hamda “Ekologik nazorat to‘g‘risida”gi qonunlarga davlat organlari tomonidan tadbirkorlik sub’yektlarining faoliyatini cheklash yoki to‘xtatib turish to‘g‘risidagi qarorlarni, birinchi navbatda, aholining hayoti va sog‘lig‘iga xavf yuzaga kelishining oldini olish zaruratini hisobga olgan holda qabul qilish asoslarini aniqlashtiruvchi o‘zgartirishlar kiritilmoqda.

Senatorlar fikricha, ushbu qonun ekologik vaziyatni yaxshilashga, aholining hayotiga va sog‘lig‘iga xavf yuzaga kelishining oldini olishga, tadbirkorlik sub’yektlarini himoya qilishga, shuningdek, korrupsiya omillarini bartaraf etishga hamda vakolatli davlat organlarining mas’uliyatini oshirishga xizmat qiladi.

“Ekologiyaga oid qonunlarda va umuman qonunchilikda, noaniq, ya’ni turlicha talqin qilish va qo‘llash mumkin bo‘lgan normalarning bo‘lishi to‘g‘ri emas. Bu hol amaliyotda turli muammolar, tushunmovchiliklar, noroziliklar va eng yomoni korrupsiya holatlarini keltirib chiqarishi mumkin.

Shu jihatdan qaraganda, kiritilayotgan o‘zgartirishlar juda muhim. Chunki mamlakatimizda sanoatlashuv darajasi yildan yilga kengayib boryapti. Bunday sharoitda ekologiyaga ta’sirlar ko‘lami ham ortib boradi. Ayniqsa, bugun Toshkentdek yirik shaharlarimizda havoning ifloslanish darajasi belgilangan me’yorlardan oshib ketishining oldini olishda ana shunday aniq huquqiy normalar muhim ahamiyat kasb etadi.

Orolbo‘yi mintaqasini rivojlantirish masalalari va ekologiya qo‘mitasi nafaqat ushbu qonunni ko‘rib chiqish, balki havoning ifloslanishi bilan bog‘liq muammolar bilan jiddiy shug‘ullanishi, tegishli davlat organlari bilan ishlashi, jamoatchilikni keng jalb etishi zarur”, deya ta’kidladi Senat raisi Tanzila Norboyeva.

Qonun senatorlar tomonidan ma’qullandi.