Hafta davomida qanday ob-havo kutilayotgani ma’lum qilindi

Bugun O‘zbekiston hududiga Turkmaniston hududidan iliq havo massalari kirib kelishi boshlanadi, respublika bo‘yicha yog‘ingarchilik kutilmaydi. Havo harorati kunduzi +9...+12 darajagacha ko‘tariladi.

“O‘zgidromet” xabariga ko‘ra, 23-24 yanvar kunlari iliq havo kirib kelishi davom etadi, respublika hududining katta qismida quyoshli va ochiq havo kuzatiladi. 

24 yanvarda respublikaning shimoli-g‘arbiy hududlariga Volga bo‘yi hududlaridan nam va sovuq havo massalari kirib kelishi boshlanadi. Qoraqalpog‘iston Respublikasi, Xorazm, Buxoro, Navoiy viloyatlarida ba’zi joylarda yog‘ingarchilik (yomg‘ir, qor) bo‘ladi. Respublika hududining katta qismida 23-24 yanvar kunlari harorat kechalari +2...+5 darajagacha, kunduz kunlari +12...+15 darajagacha ko‘tariladi, shimoliy hududlarda esa 24 yanvarda kunduzgi harorat -2...-7 darajagacha pasayadi.

25 yanvarda nam va sovuq havo massalari mamlakat barcha hududlarini qamrab oladi, respublika bo‘yicha yog‘ingarchilik (yomg‘ir, qor) bo‘ladi. Harorat kunduzi +4...+9 darajagacha pasayadi, shimoliy hududlarda kechasi -6...-11 darajani tashkil etadi, kunduzi -2...-7 darajadan oshmaydi.

26 yanvarda respublika hududining katta qismida yog‘ingarchilik bo‘lishi ehtimoli saqlanib turadi, shimoli-g‘arbiy hududlarda esa yog‘ingarchilik to‘xtaydi. Harorat kechasi -2...+3 daraja, kunduzi +3...+8 daraja, shimolda kechasi -6...-11 daraja, kunduzi -0...-5 daraja atrofida bo‘ladi.

Poytaxtda bugun quyoshli va ochiq havo bo‘lishi kuzatiladi. Sharqiy yo‘nalishdagi shamol 3-8 m/s tezlikda esadi. Havo harorati kunduzi +10...+12 darajani tashkil etadi.

23-24 yanvar kunlari poytaxtda yog‘ingarchilik kutilmaydi. Ertaga kechasi va ertalab tuman tushishi mumkin. Sharqiy yo‘nalishdagi shamol tezligi 3-8 m/s bo‘ladi. Havo harorati 23 yanvarda kechasi +0...+2 daraja atrofida bo‘ladi, 24 yanvarda kechasi +3...+5 darajagacha ko‘tariladi, kunduzi 23-24 yanvarda harorat +12...+14 daraja atrofida bo‘ladi.

25 yanvarda poytaxtda vaqti-vaqti bilan yomg‘ir yog‘adi. Sharqiy shamol yo‘nalishini o‘zgartirib, g‘arbdan 5-10 m/s tezlikda esadi. Harorat kechasi +5...+7 darajagacha ko‘tariladi, kunduzi +7...+9 darajagacha pasayadi.